X (keçmiş Twitter) sosial şəbəkəsi süni zəka modellərinin təlimatlandırılmaları prosesində öz istifadəçilərinin məlumatlarını və açıq mənbələrdən olan məlumatları istifadə edəcək. Şirkətin yenilənmiş konfidensiallıq siyasətində qeyd edilib ki, o, machine learning alqoritmlərinin təlimatlandırılmaları üçün özü tərəfindən yığılan məlumatları və açıq mənbə şəklində yerləşən istənilən məlumatı istifadə etməyi planlaşdırır. X-in sahibi olan Elon Musk şirkətin konfidensiallıq siyasətindəki bu dəyişikliyi təsdiqləyib.

    Lakin bununla belə Musk bildirib ki, şirkət süni zəka modellərinin təlimatlandırılmaları prosesində istifadəçilərin yalnız açıq mənbə şəklində yerləşən məlumatlarından istifadə edəcək. Yəni mesajlardan və ya digər özəl məlumatlardan bu prosesdə istifadə edilməyəcək. Qeyd etmək lazımdır ki, hələ keçən həftə məlum oldu ki, X istifadəçilərin biometrik və məşğulluq məlumatlarını da yığacaq. Məşğulluq ilə bağlı məlumatların yığılması məsələsində şirkət bildirmişdi ki, bu, istifadəçilərə uyğun iş vakansiyalarının təklif olunması üçün ediləcək. Görünür, Musk X vasitəsilə həmçinin LinkedIn-in də alternativini yaratmaq istəyir.