YouTube ABŞ-də DM funksiyasını genişləndirir

    YouTube mobil tətbiqində sınaqdan keçirilən DM funksiyasını ABŞ istifadəçiləri üçün də istifadəyə verib. İlk dəfə ötən il İrlandiya və Polşada test edilən yenilik daha sonra bir sıra Avropa ölkələrinə yayılmışdı. İndi isə 18 yaşdan yuxarı ABŞ istifadəçiləri də bu funksiyanı sınaqdan keçirə biləcəklər. Əslində bu, YouTube-un ilk mesajlaşma təşəbbüsü deyil. Platforma 2017-ci ildə oxşar funksiyanı istifadəyə vermiş, lakin iki il sonra istifadəçiləri şərhlər bölməsində daha aktiv olmağa təşviq etmək məqsədilə onu ləğv etmişdi.

    Şirkətin bildirdiyinə görə, birbaşa mesajlaşma istifadəçilər tərəfindən ən çox tələb olunan funksiyalardan biri olub. Avropa ölkələrində əldə edilən müsbət rəylərdən sonra YouTube bu təcrübəni daha geniş auditoriyaya təqdim etməyə qərar verib. Yeni funksiyadan istifadə etmək üçün tətbiqin yuxarı sağ küncündə yerləşən “Messages” bölməsinə daxil olaraq “Invite to chat” seçimini etmək kifayətdir. İstifadəçi istədiyi şəxsə söhbət dəvəti göndərə bilər və qarşı tərəf bu dəvəti qəbul və ya rədd etmək hüququna malikdir.

    YouTube bildirir ki, əsas məqsəd istifadəçilərin platformadakı videoları və Shorts məzmunlarını dostları ilə daha rahat paylaşmasını təmin etməkdir. Bununla belə, şirkət vurğulayır ki, videoları digər mesajlaşma tətbiqləri vasitəsilə paylaşmaq imkanı da əvvəlki kimi qalacaq. Hazırda funksiya eksperimental mərhələdədir və gələcəkdə daha çox ölkədə istifadəyə veriləcəyi gözlənilir.