Youtube-da Stories paylaşımları etmək imkanı ləğv ediləcək

    Snapchat Stories paylaşımlarını məşhurlaşdırandan sonra müxtəlif sosial şəbəkə ilə servislər bu özəlliyi öz platformalarına inteqrasiya etməyə başladılar. Buna misal olaraq, Facebook-u, Whatsapp-ı və Instagram-ı gətirmək olar. Youtube da bu məsələdə istisna olmadı. Lakin görünür, Youtube-da Stories paylaşımları o qədər də məşhur deyillər. Belə ki, dünyanın ən məşhur video platforması Stories-lərin paylaşılması funksiyasını ləğv edəcək.

    Artıq 26 iyun tarixindən başlayaraq istifadəçilər Youtube hesablarına Stories-lər yükləyə bilməyəcəklər. Həmin müddətə kimi yüklənəcək istənilən Stories paylaşımı 7 gündən sonra avtomatik olaraq silinəcək. Qeyd etmək lazımdır ki, Youtube Stories paylaşımlarını qısa formatlı videolar adı ilə 2017-ci ildə test etməyə başladı. Lakin daha sonra video platformada Youtube Shorts videolar istifadəyə verildi. Məlumatda qeyd edilib ki, adi video paylaşımlar Stories-lərdən fərqli olaraq daha çox rəylərə və bəyənmə saylarına sahibdirlər.