YouTube son 4 ildə kontent müəlliflərinə 100 milyard dollardan çox vəsait ödəyib

     YouTube bildirib ki, 2021-ci ildən bəri kontent müəlliflərinə, artistlərə və media şirkətlərinə 100 milyard dollardan çox ödəniş edib. Ötən il YouTube-un baş direktoru Neal Mohan bəyan etmişdi ki, 2021-2024-cü illər arasında müəlliflərə edilən ödənişlərin həcmi 70 milyard dollar təşkil edib. Ödənişlərin artımı qismən platformanı dəstəkləyən televizorlarda izləyici sayının çoxalması ilə bağlıdır. Şirkətin məlumatına görə, yalnız TV üzərindən baxışlardan illik 100 000$-dan çox qazanan kanalların sayı ötən illə müqayisədə 45% artıb. YouTube-un məhsullar üzrə baş direktoru Johanna Voolich şirkətin mətbuat açıqlamasında müəlliflərin mədəniyyəti və əyləncəni heç vaxt mümkün hesab etmədiyimiz üsullarla formalaşdırmaq bacarıqlarını yüksək qiymətləndirib.

     Nyu-Yorkda keçirilmiş illik Made on YouTube tədbirində platforma ödənişlər barədə yenilənmiş məlumatları və müəlliflər üçün yeni alətlər paketini təqdim etdi. Şirkət YouTube Shorts - qısa şaquli videolar yaratmaq xidməti üçün yeni süni intellekt alətlərini elan etdi. Müəlliflər süni intellekt vasitəsilə emal olunmamış kadrları montaj edilmiş kliplərə çevirə, həmçinin musiqi, keçidlər və səsləndirmə əlavə edə biləcəklər. Yeni funksiyalar həmçinin uyğun videolardan dialoqları mahnılara çevirmə və onları Short-larda istifadə etmə imkanını da əhatə edir. YouTube-un açıqlamasına görə, Google-un süni intellekt əsasında hazırlanmış ən son video generatoru Veo 3 də Shorts-a inteqrasiya olunacaq. Bu ilin aprelində YouTube-un 20 ili tamam oldu. Həmin vaxt şirkət elan etdi ki, bütün bu müddət ərzində platformada musiqi, qısa videolar, podkastlar və digər məzmunlar daxil olmaqla 20 milyarddan çox video yerləşdirilib.