YouTube Trending bölməsini bağladığını elan edib

     YouTube Trending səhifəsini və Trending now siyahısını bağladığını elan edib. Bu bölmələr təxminən on ildir ki, istifadəçilərə platformada ən məşhur videoları tapmağa kömək edirdi. Artıq ümumi trend siyahısı əvəzinə tematik çartlar olacaq və burada kontent musiqi klipləri, podkastlar və kino treylerləri kimi kateqoriyalar üzrə sıralanacaq. Şirkət izah edib ki, bu dəyişiklik Trending bölməsi ilk dəfə 2015-ci ildə təqdim olunduqdan bəri məşhur kontenti axtarma üsullarının əhəmiyyətli dərəcədə dəyişməsi ilə bağlıdır. Əvvəllər viral videolar milyonlarla baxış toplayırdı, çünki onlar ümumi siyahıda görünürdü, lakin indi istifadəçilər trend kontenti daha çox tövsiyələr, axtarış və müzakirələr vasitəsilə tapırlar.

     Trending səhifəsinin ziyarət sayı son 5 il ərzində durmadan azalırdı. YouTube vahid siyahı əvəzinə istifadəçilərə maraqlarına əsaslanan fərdiləşdirilmiş tövsiyələr təqdim etməyə davam edəcək. Bununla belə, tövsiyələrə daxil olmayan məşhur kontentlə tanış olmaq istəyənlər Explore menyusundan, müəlliflərin kanallarından və abunə lentindən istifadə edə biləcəklər. Qeyd olunur ki, platforma hələ də kontent yaradıcılarının dəstəyinə yönəlib. Belə ki, YouTube Studio-da müəlliflərə kanallarını inkişaf etdirmək üçün ideyalar təqdim edən Inspiration bölməsi qalacaq. Bundan əlavə, yeni alətlər üzərində iş aparılır. Məsələn, Hype funksiyası izləyicilərə sevdikləri videoları irəli çəkməyə imkan verəcək. YouTube, həmçinin perspektivli yaradıcıları öz rəsmi kanalında və sosial şəbəkələrdə tanıtmağı planlaşdırır.