YouTube-un yeni rəqibi? Bilibili Qərb bazarına daxil olur

    Çinin YouTube-a alternativ video platformlarından biri olan Bilibili beynəlxalq bazara çıxmaq üçün yeni addımlar atır. Şirkət Android üçün beynəlxalq tətbiqini yenidən istifadəyə verib və Qərb ölkələrindəki kontent yaradıcılarını platformaya cəlb etməyə başlayıb. Tətbiqin iOS versiyasının da təqdim olunacağı bildirilir. Bilibili əvvəllər də Çin xaricində istifadə oluna bilirdi. Lakin yeni strategiya platformanı sadəcə xaricdən əlçatan etmək deyil, onu qlobal istifadəçilər və kontent yaradıcıları üçün ayrıca rəqib platformaya çevirməkdir.

    Bu istiqamətdə ən mühüm dəyişikliklərdən biri şəxsiyyətin təsdiqlənməsi tələbinin aradan qaldırılmasıdır. Əvvəllər xaricdən Bilibili-də kontent paylaşmaq istəyən istifadəçilərdən pasport və ya digər şəxsiyyət sənədi tələb edilirdi. Yeni beynəlxalq tətbiqdə isə buna ehtiyac qalmayacaq. Platforma həmçinin Çin və digər ölkələrdən olan videoları eyni tətbiq daxilində istifadəçilərə təqdim etməyi planlaşdırır. Beləliklə, beynəlxalq auditoriya Çin kontentini, Çin istifadəçiləri isə qlobal kontenti daha rahat kəşf edə biləcək.

    Semafor-un məlumatına görə, Bilibili qlobal genişlənmə üçün Los-Anceles, London, Mexiko, San-Paulu, İstanbul və Tokioda yeni əməkdaşlar işə götürür. Şirkət həmçinin kontent yaradıcılarının video yükləməsini asanlaşdırmaq üçün saytının ingilisdilli versiyasını hazırlayır.