'SoftBank' müxtəlif texnoloji layihələrə 880 milyard dollar investisiya yatıracaq

Bu şirkət artıq 100 milyard dollar sərmayesi olan Vision Fund adlı investisiya fonduna sahibdir. Onun yeni investisiyaları isə hər 2-3 il ərzində baş tutacaq. Qeyd etmək lazımdır ki, “SoftBank”, “Nvidia”, “ARM” və “Improbable” kimi şirkətlərə investisiya yatırmaq üçün Vision Fund-dan istifadə edib. Bununla yanaşı sözügedən fond həmçinin “Uber”in 20%-ni almağa da yaxındır. “SoftBank Group” şirkətinin CEO-su Masayoshi Son bir neçə gün bundan öncə qeyd etmişdi ki, bu fond öz vəsaitlərini bitirdikdən sonra bir-birinin ardınca Vision Fund 2, 3 və 4 fondları da yaradılacaq və onların ümumi sərmayeləri 880 milyard dollar təşkil edəcək.

O qeyd edib ki, “SoftBank” 1000-ə yaxın texnoloji şirkətlərə investisiya yatırmağı planlaşdırır. İlk növbədə üstünlük süni zəka və robotexnika sahəsində çalışan şirkətlərə veriləcək. Masayoshi Son bir müddət bundan öncə etiraf etmişdi ki, o, sinqulyarlıq konsepsiyasına inanır və bu konsepsiyanın 30 ildən sonra reallaşacağını güman edir. Lakin indidən o, buna nəzərən investisiyaları edir.

Həmçinin o inanır ki, süni zəka, insanlardan qat-qat ağıllı olacaq robotlara yeni yol açacaq. O bildirib ki, 880 milyard dollar növbəti 10 illik investisiyalar üçün ona bəs edəcək. Bu şirkətin yüksək miqdarda və sürətli investisiyalarını nəzərə alsaq, bu cür böyük məbləğ üçün 10 il çox böyük müddət kimi görünür.