'Tesla'nın 'rəqibi' iflasın astanasındadır

Bu şirkət elektromobil bazarını tamamilə dəyişməyi və Elon Musk-ın şirkəti ilə rəqabət aparmağı planlaşdırırdı. Lakin sonradan şirkət ciddi maliyyə və şirkət daxilində idarəetmə problemləri ilə qarşılaşdı. Hal hazırda isə bu startap iflasın astanasındadır. Bu barədə Electrek saytı xəbər verib. Hələ bu ilin May ayında sözügedən startap “Tesla” şirkətinin 10-a yaxın işçisini öz tərəfinə çəkmişdi. Bununla yanaşı startap 1 milyard dollar investisiyanın cəlb olunacağını söz vermişdi. Bu cür böyük miqdarda investisiya, 1500-ə yaxın işçi və eyni zamanda bir neçə istehsalat mühitinin yaradılması həqiqətən də bir çoxlarını inandırmışdı ki, bu layihə “Tesla”nın potensial rəqibi olacaq.

Lakin bir neçə müddət bundan öncə məlum oldu ki, şirkətin bir çox əməkdaşı layihəni tərk edib. Məlumata əsasən layihədən şirkətin baş maliyyə direktoru Stefan Krause (əvvəllər “BMW” və “Deutsche Bank”da çalışıb), baş texniki direktoru Ulrich Kranz (əvvəllər “BMW”nin elektromobil istehsalatı şöbəsinin rəhbəri kimi çalışıb) çıxıblar. Bununla yanaşı şirkəti həmçinin tənzimlənmə sualları ilə bağlı mütəxəssis Kevin Vincent və kompüterləşdirilmiş görmə qabiliyyəti üzrə mütəxəssis Khalid Yousif, bir sıra menecer və mühəndislər tərk ediblər. Bununla yanaşı startap həmçinin qalmaqal ilə də qarşılaşmışdı. Belə ki, maliyyə direktoru Stefan Krause-un şirkətdən getməsi barədə məlumatların ortaya çıxmasından bir qədər əvvəl şirkətin saytında ona qarşı ittihamlar paylaşılmışdır.

Həmin ittihamlarda Stefan Krause öz vəzifəsindən suistifadə etməsi, vəsaitlərin cəlb olunması barədə yaratdığı problemlər və qanun pozuntusu ilə günahlandırılırdı. Təəccüblü səslənsə də şirkət bu şəxsi məhz maliyyə problemlərinin aradan qaldırılması üçün işə götürmüşdü. O isə öz növbəsində şirkətin krizisdən çıxması üçün bir sıra üsullar təklif etmişdi. Həmin təkliflərin arasında həmçinin iflas məsələsinə görə ABŞ kodeksinin 11-ci maddəsi sayəsində şirkətin yenidən qurulması da var idi. Onun bu cür üsulları isə “Faraday Future”in əsas investoru Jia Yueting-in xoşuna gəlməmişdi.

Beləliklə Yueting “Faraday Future”in maliyyələşdirilməsini digər elektromobil şirkətindəki problemlər ucbatından azaltmalı oldu. Söhbət “LeEco” şirkətindən gedir. Qeyd etmək lazımdır ki, “LeEco” “Faraday Future”a məxsus olan bir şirkətdir. Məlumata əsasən bu şirkət çox sürətlə böyüyürdü. Lakin onun sürətlə böyüməyi artıq olan maliyyə problemlərinin artmasına gətirib çıxartdı. “LeEco”nun vəsaitləri bitdi və investorlar öz səhmlərindən canlarını qurtarmağa başladılar. Nəticədə şirkət Nevada ştatında elektromobil istehsalı üçün nəzərdə tutulmuş zavodun tikintisini dayandırmalı oldu. Həmin vaxtda Yueting şirkətdəkı rəhbərlik vəzifəsindən imtina etdi və bildirdi ki, o öz diqqətini “Faraday Future”a yönəldib. Lakin Çinin informasiya agentliklərinin məlumatlarına əsasən Yueting startapın iflasını elan etməyə və onu amerikalı investorlara satmağı planlaşdırır.