2 ABŞ qəzeti OpenAI və Microsoft-a müəllif hüquqları iddiası qaldırıb

    “Seattle Times” və “Newsday” cümə günü “OpenAI” və “Microsoft” şirkətlərinə qarşı birgə məhkəmə iddiası qaldırıb. Xəbər qurumları bildirir ki, şirkətlər müəllif hüquqları ilə qorunan materiallardan süni intellekt sistemlərini öyrətmək üçün icazəsiz yararlanıb. İddiaçılara görə, mətn və digər məzmun yaradan süni intellekt xəbər qurumlarının fəaliyyətini, eləcə də bu sistemlərin öyrədilməsi üçün lazım olan məzmunun gələcəyini təhlükə altına salır.

    İddiaçılar bildirir ki, “OpenAI” və “Microsoft” ödəniş divarlarını keçərək xəbər məqalələrini sistemli şəkildə toplayıb. Onların fikrincə, süni intellekt bu materiallara əsaslanan cavablar hazırlayır. Beləliklə, istifadəçi orijinal xəbəri oxumadan məlumat əldə edir. Nəticədə xəbər saytlarına giriş, rəqəmsal reklam gəlirləri azalır və xəbərə əsaslanan biznes modeli zəifləyir.

    Məhkəməyə təqdim olunan sənəddə başqa problemlər də qeyd edilib. İddiaçılara görə, süni intellekt sistemləri bəzən uydurma məlumat yaradır və bunu xəbər qurumlarının adından təqdim edir. Bu hal süni intellekt sahəsində “hallüsinasiya”, yəni sistemin həqiqətə uyğun olmayan məlumat yaratması adlanır. Həmçinin məqalələrdə müəllif hüquqları və mənbə barədə məlumatların silindiyi iddia edilir.

    Bu məhkəmə işi xəbər qurumları ilə süni intellekt şirkətləri arasında davam edən müəllif hüquqları mübahisələrinin növbəti mərhələsidir. “New York Times” 2023-cü ildə oxşar səbəblərlə “OpenAI” və “Microsoft” şirkətlərini məhkəməyə vermişdi. “CNN” isə ilin əvvəlində müəllif hüquqlarını pozduğu iddiası ilə “Perplexity” şirkətinə qarşı məhkəməyə müraciət edib. “AP” və “Vox Media” fərqli yol seçib. Onlar “OpenAI” ilə tərəfdaşlıq quraraq materiallarının süni intellekt sistemlərinin öyrədilməsində istifadəsinə icazə veriblər.