2 bacı gənc qadınlar üçün süni intellektli münasibət məsləhətçisi yaradıb

    Bacılar Balia Mudgil və Sumrin Mudgil gənc qadınlar üçün “Hot Girl Hotline” adlı, süni intellektə əsaslanan münasibət məsləhəti xidməti yaradıblar. Tətbiqin məqsədi tanışlıq və şəxsi münasibətlər barədə söhbətləri ümumi çatbotlarla müqayisədə daha təhlükəsiz saxlamaqdır. Nyu-Yorkda yaradılan xidmət hazırda iOS tətbiqində və internetdə işləyir.

    “Hot Girl Hotline” istifadəçinin emosional bağ quracağı süni intellekt yoldaşı deyil. Məsləhətlər insan davranışını araşdıran elmi yanaşmalara əsaslanır, söhbət də etibarlı dostla danışıq üslubunda gedir. Sistem hazır cavablar verməkdənsə suallar soruşur. Beləliklə, istifadəçi qərarının səbəbini özü anlamağa çalışır. Xidmət real insanla söhbəti və peşəkar klinik məsləhəti əvəz etmir.

    Tərtibatçılar şəxsi mövzuların ümumi çatbotlarla müzakirəsinin psixoloji baxımdan həssas insanlar üçün risk yarada biləcəyini nəzərə alıblar. Söhbət zamanı təhlükə əlaməti aşkarlanarsa, istifadəçi ABŞ-dəki 988 böhran xətti kimi yardım mənbələrinə yönləndirilir. Süni intellekt söhbəti qəsdən uzatmır və uyğun vaxtda yekunlaşdırır. Məqsəd insanın problemi dayanmadan düşünməsi yox, real həyatda addım atmasıdır.

    Tətbiq məsləhətləri istifadəçinin dəyərlərinə, məqsədlərinə, kimliyinə və zövqünə uyğunlaşdırır. Xidmət bir neçə süni intellekt modeli ilə işləyir. Məlumatlar həm göndərilərkən, həm də saxlanarkən şifrələnir. Şirkətin sözlərinə görə, istifadəçi məlumatları satılmır və modellərin öyrədilməsi üçün işlədilmir. Kənar süni intellekt modelinə sorğu göndəriləndə də məlumatların saxlanmaması qaydası qüvvədə qalır.

    “Hot Girl Hotline” aylıq 9,99 dollar (təxminən 17 manat) abunə hesabına gəlir qazanmağı planlaşdırır. Ən fəal 100-lərlə istifadəçi artıq abunə haqqını ödəyir. Gələcəkdə xidmətə reklamlar da əlavə oluna bilər. Layihə hələlik təsisçilərin öz pulu ilə maliyyələşir. Komanda münasibət məsləhətlərindən sonra gözəllik və həyat tərzi mövzularına keçməyi də düşünür.