32 yaşlı Jeep Claude və Codex adlı AI alətləri ilə emissiya testindən keçdi

    Süni intellekt həvəskarı Muhammad Zulali 1994-cü il istehsalı olan 32 yaşlı “Jeep Cherokee” avtomobilini “Claude” və “Codex” köməyi ilə Kaliforniyanın emissiya testindən keçirib. Avtomobil normadan çox NOx, yəni azot oksidləri buraxdığı üçün yoxlamadan keçmirdi. Problem əvvəlcə təxminən 40 km/saat sürətdə üzə çıxıb. Oksigen qarışığı dəyişdiriləndən sonra vəziyyət daha da pisləşib. Avtomobil həm 40 km/saat, həm də 80 km/saat sürətdə testdən kəsilib.

    Hər rəsmi yoxlama 100 dollara (təxminən 170 manat) başa gəldiyindən nasazlığın səbəbini dəqiq tapmaq lazım idi. Avtomobildə müasir diaqnostika sistemi yox idi, mühərriki sadə kompüter idarə edirdi. “Claude” müəyyən edib ki, kompüter məlumatları təxminən 7800 bod sürətli “Chrysler” SCI rabitə xətti ilə ötürür. Siqnal adi serial bağlantıdan fərqli olaraq tərs göndərilirdi. Onu çevirib noutbuka çatdırmaq üçün 3 dollarlıq (təxminən 5 manat) “Arduino Nano” lövhəsi seçilib.

    Lövhədən çıxan 3 naqil avtomobilin 6 kontaktlı diaqnostika girişinə qoşulub. İlk bağlantı zamanı sistem yalnız soyuducu mayenin temperaturunu və akkumulyatorun gərginliyini göstərə bilib. Daha sonra “Claude” 40 km/saat və 80 km/saat sürətlə aparılan sınaqlarda mühərrik məlumatlarını və xəta kodlarını toplayıb. Yanacaq təzyiqi kimi göstəricilər də izlənib. Bu mərhələdə başqa avtomobil modelinə aid məlumat əsasında hesablanan 22% artıq yanacaq ehtimalının yanlış olduğu üzə çıxıb.

    Nasazlığın səbəbi tapıldıqdan sonra Zulali mühərriki idarə edən əsas ECU kompüterinin proqramını yeniləmək istəyib. Ancaq avtomobilin kompüteri bu yeniləməni dəstəkləyən versiyadan bir neçə ay köhnə olub. Buna görə “Codex” yaxınlıqdakı EEPROM yaddaşına xüsusi kod yazıb və kod həmin yaddaşda işə salınıb. Nəticədə avtomobil Kaliforniyada tələb olunan emissiya testlərindən keçib. Layihə üçün mexanikə və ya “Chrysler” servis cihazına ehtiyac qalmayıb, ümumi xərc 15 dolları keçməyib (təxminən 26 manat). “xj-scanner” proqramı “GitHub” platformasında GPLv3 lisenziyası ilə pulsuz yayımlanıb.