ABŞ Avropa Birliyindən sərt süni zəka qanunlarından imtina etməyi tələb edir

     Avropa Birliyi süni zəka tərtibatçıları üçün alqoritmlərin şəffaflığına, risklərin azaldılmasına və müəllif hüquqlarının qorunmasına dair tələbləri sərtləşdirəcək qaydalar toplusu hazırlayır. Buna cavab olaraq ABŞ Avropa Birliyini amerikalı şirkətlərə qarşı diskriminasiyada ittiham edib və bu qaydaları qeyri-real adlandırıb. Bloomberg-in məlumatına görə, ABŞ-ın Avropa Birliyi yanında diplomatik missiyası Avropa Komissiyasına müraciət edərək, təklif olunan süni zəka üzrə davranış kodeksinin yenidən nəzərdən keçirilməsini tələb edib. Eyni məzmunlu müraciətləri - kodeksin mövcud formada qəbul edilməsinə qarşı arqumentlər irəli sürən sənədləri - bir sıra Avropa ölkələrinin hökumətləri də alıblar.

     Baxmayaraq ki, tələblər tövsiyə xarakteri daşıyır, onların məqsədi texnologiya şirkətlərinə gələcəkdə qüvvəyə minəcək Avropa Birliyinin "Süni Zəka Qanunu"na uyğunlaşmaqda kömək etməkdir və bu tələblərin pozulması şirkətin qlobal dövriyyəsinin 7%-ə qədər cərimə olunması ilə nəticələnə bilər. Eyni zamanda, tənqidçilər iddia edirlər ki, təklif olunan normalar qanunun hüdudlarından kənara çıxır və artıq bürokratik yük yaradır. Qeyd olunur ki, Donald Trump Avropa Birliyinin texnologiya sektorunu sərt tənzimləməsini dəfələrlə tənqid edib və bunu amerikalı şirkətlər üçün "vergi forması" adlandırıb.

     O bunu yanvar ayında Davosda keçirilmiş Dünya İqtisadi Forumu zamanı bəyan edib. Bundan əvvəl ABŞ Nümayəndələr Palatasının Hüquq Komitəsinin rəhbəri Jim Jordan da Avropa Birliyini amerikalıların söz azadlığını məhdudlaşdırmaqda ittiham etmişdi. Bu arada iri İT korporasiyaları artıq yeni qaydalarla bağlı narazılıqlarını bildiriblər. Belə ki, Meta şirkətinin qlobal əlaqələr üzrə rəhbəri Joel Kaplan kodeksi "işlək olmayan və qeyri-real" adlandırıb və bildirib ki, şirkət onun hazırkı redaksiyasını imzalamayacaq. Alphabet nümayəndəsi də müəllif hüquqlarının yoxlanılması və süni zəka modellərinin test edilməsi ilə bağlı tələbləri tənqid edib.

     Münasibətlər Avropa Birliyinin Apple və Meta şirkətlərinə qarşı antimonopoliya qaydalarını pozduqları üçün 700 milyon avro məbləğində yeni cərimələr tətbiq etməsi fonunda daha da gərginləşib. Ağ Evin Milli Təhlükəsizlik Şurasının nümayəndəsi Brian Hughes bu tədbirləri "iqtisadi şantaj" adlandırıb. Kodeksin hazırlanmasında texnologiya şirkətləri, müəllif hüquqları sahibləri və vətəndaş cəmiyyəti nümayəndələri Avropa Komissiyasının rəhbərliyi altında iştirak edirlər. Sənədin yekun versiyası gələn ay təqdim olunacaq və bundan sonra sənəd Avropa Birliyinin institutları və üzv dövlətlərin nümayəndələri tərəfindən təsdiqlənməlidir.

Mənbə: Bloomberg