Adobe Firefly artıq süni intellektlə musiqi yaradır

    Adobe Firefly süni intellekt platformasının musiqi, nitq və səs effektləri yaratmağa imkan verən yeni audio alətləri artıq bütün istifadəçilər üçün əlçatandır. Şirkət bu funksiyaları təkcə kontent yaratmaq vasitəsi kimi deyil, həm də müəllif hüquqları baxımından daha təhlükəsiz alternativ kimi təqdim edir. Firefly-a əlavə edilən Generate Music, Generate Speech və Generate Sound Effects funksiyalarının hər biri Adobe-un fərqli süni intellekt modeli əsasında işləyir.

    Generate Music mətn təsviri əsasında videonun uzunluğuna və əhvalına uyğun orijinal musiqilər yarada bilir. Generate Speech vasitəsilə süni səsləndirmə hazırlamaq, səsin tempini və emosiyasını dəyişmək mümkündür. Adobe burada öz modelindən əlavə ElevenLabs texnologiyasını da seçim kimi təqdim edir. Generate Sound Effects isə videodakı hadisələrin vaxtına uyğun səs effektləri yaratmağa imkan verir. Adobe yeni imkanların sosial şəbəkə videoları, vloqlar, qısametrajlı filmlər, məhsul təqdimatları, təlim videoları və podkastlar üçün nəzərdə tutulduğunu bildirir. Audio funksiyalar üçün ayrıca abunə paketi də tələb olunmur.

    Süni intellektlə musiqi yaradan xidmətlər artıq kifayət qədər çoxdur. Adobe isə Firefly-ın əsas üstünlüyünü yaradılan musiqinin keyfiyyətindən daha çox onun kommersiya istifadəsi üçün təhlükəsiz olmasında görür. Şirkət Generate Music ilə yaradılan musiqiləri kommersiya layihələrində istifadə edilə bilən və universal şəkildə lisenziyalaşdırılmış orijinal treklər kimi təqdim edir. Adobe-un iddiasına görə, yaradıcılar bu musiqilərdən müştəri və brend layihələrində istifadə edərkən müəllif hüquqları səbəbindən kontentin silinməsi kimi problemlərdən narahat olmamalıdırlar.

    Bunun əsas səbəbi Adobe-un Firefly modellərini lisenziyalaşdırılmış və ictimai mülkiyyətdə olan materiallar üzərində öyrətməsidir. Şirkət Firefly-ı istifadəyə verdiyi ilk gündən generativ süni intellekt strategiyasını məhz bu yanaşma üzərində qurub.