AI artıq sizin yerinizə Stream Deck düymələrini idarə edəcək

    Technote.az “The Verge” platformasına istinadən bildirir ki, Elgato şirkəti Stream Deck istifadəçiləri üçün yeni və maraqlı bir funksiyanı istifadəyə verib. Stream Deck 7.4 proqram yeniləməsi ilə artıq süni intellekt köməkçiləri Stream Deck düymələrini sizin yerinizə idarə edə biləcək. Bu yeniləmə Model Context Protocol (MCP) dəstəyini gətirir və bunun sayəsində ChatGPT, Claude və Nvidia G-Assist kimi AI alətləri Stream Deck üzərində qurulmuş əmrləri avtomatik işə sala bilir.

    Şirkətin açıqlamasına görə, istifadəçi əvvəlki kimi Stream Deck proqramında makro əmrləri və düymələri qurur, lakin MCP texnologiyası bu əmrləri işə salmaq üçün yeni bir üsul təqdim edir. Artıq istifadəçi sadəcə mətn yazaraq və ya səsli komanda verərək AI-a göstəriş verə bilər və süni intellekt uyğun Stream Deck əməlini avtomatik aktivləşdirəcək.

    MCP texnologiyası Microsoft, Anthropic, Figma və Canva kimi böyük şirkətlər tərəfindən dəstəklənir və hazırda süni intellekt üçün universal bağlantı standartlarından biri kimi qəbul olunur. Bu texnologiya AI sistemlərinin üçüncü tərəf tətbiqlərə birbaşa qoşulmasına imkan yaradır. Elgato-nun bu yeniləməsi isə Stream Deck üzərində qurulmuş bütün makroları səs və ya mətn vasitəsilə idarə etməyə imkan verir.

    Bu funksiyanı aktivləşdirmək üçün istifadəçilər Stream Deck proqramını 7.4 versiyasına yeniləməli, ayarlara daxil olaraq “Enable MCP Actions” bölməsini aktiv etməlidirlər. Bundan əlavə, AI ilə Stream Deck arasında əlaqə yaratmaq üçün Node.js aləti və Elgato MCP Server bridge proqramı da kompüterə quraşdırılmalıdır. Yeni funksiya xüsusilə kontent yaradıcıları, yayımçılar və avtomatlaşdırma ilə işləyən istifadəçilər üçün Stream Deck istifadə təcrübəsini daha sürətli və hands-free hala gətirməyi hədəfləyir.