AI-ı “az data” ilə öyrətmək üçün 180 milyon dollarlıq yeni laboratoriya

    Technote.az “TechCrunch” platformasına istinadən bildirir ki, son aylarda tədqiqat yönümlü yeni AI laboratoriyaları sürətlə artır və onların arasında “Flapping Airplanes” xüsusilə diqqət çəkir. Gənc və iddialı üç həmtəsisçi qardaşlar Ben və Asher Spector, eləcə də Aidan Smith laboratoriyanı “daha az məlumatla daha ağıllı AI” ideyası üzərində qurduqlarını deyir.

    Həmtəsisçilərin fikrincə, mövcud frontier modellər insan biliklərinin demək olar ki, hamısı üzərində məşq edir, amma insan beyni çox daha az məlumatla öyrənməyi bacarır. “Flapping Airplanes” bu boşluğu araşdırır: insan beyninin öyrənmə mexanizmləri transformerlərdən və gradient enişi kimi klassik AI təlim metodlarından fərqli olduğuna görə, laboratoriya “başqa cür işləyən” alqoritmlərin mümkünlüyünə inanır. Aidan Smith bunu belə izah edir: beyin “alternativ alqoritmlərin mövcudluğuna sübutdur”, amma məqsəd beynin tam kopyası deyil, ondan ilham alıb, silikonun üstünlüklərinə uyğun yeni yanaşmalar qurmaqdır.

    Flapping Airplanes-in ən çox danışılan məqamlarından biri də maliyyələşmədir. Laboratoriya toxum mərhələsində 180 milyon dollar cəlb edib və bu, bazarda “tədqiqat dövrünə” investor iştahasının artdığını göstərir. Komanda kommersiyalaşdırmanı inkar etmir, sadəcə erkən mərhələdə iri müqavilələrin tədqiqatı yayındıracağından ehtiyat edir. Onlar əvvəlcə “həqiqəti tapmaq”, sonra real dünyanın geribildirimi ilə məhsullaşmaq niyyətindədir.