AI köməkçi artıq mesajlaşma tətbiqlərində

    Technote.az “TechCrunch” platformasına istinadən bildirir ki, süni intellekt sahəsində “agent” anlayışı sürətlə populyarlaşdığı bir dövrdə, yeni startup olan Poke bu texnologiyanı daha sadə və gündəlik istifadə üçün uyğun formata gətirməyi hədəfləyir. Şirkət istifadəçilərə AI köməkçisini iMessage, SMS, Telegram və bəzi regionlarda WhatsApp vasitəsilə istifadə etməyə imkan verir.

    Mart ayında rəsmi olaraq istifadəyə verilən Poke, klassik çatbotlardan fərqli olaraq sadəcə suallara cavab verməklə kifayətlənmir, həm də istifadəçinin adından real tapşırıqları yerinə yetirə bilir. Məsələn, istifadəçilər gündəlik planlama, təqvim idarəsi, sağlamlıq və fitness izləmə, ağıllı ev cihazlarının idarəsi və hətta foto redaktəsi kimi funksiyaları birbaşa mesaj vasitəsilə həyata keçirə bilirlər. Bu yanaşma onu ənənəvi AI çatbotlardan fərqləndirir. Məsələn, ChatGPT və ya Claude daha çox məlumat əldə etmək və araşdırma üçün istifadə olunursa, Poke daha çox “iş görmək” və gündəlik tapşırıqları avtomatlaşdırmaq üçün nəzərdə tutulub.

    Poke istifadəçilərə fərdi avtomatlaşdırmalar yaratmaq imkanı da təqdim edir. İstifadəçilər sadə mətn vasitəsilə müəyyən qaydalar qura bilər: məsələn, müəyyən şəxslərdən gələn e-maillər barədə xəbərdarlıq almaq, səhər hava şəraitinə uyğun geyim tövsiyəsi əldə etmək və ya dərman qəbulunu xatırlatmaq kimi funksiyalar mümkündür. Bu avtomatlaşdırmalar paylaşılaraq digər istifadəçilər tərəfindən də tətbiq edilə bilər. Layihə Spark Capital və General Catalyst kimi investorların dəstəyi ilə inkişaf edir. Startup son maliyyələşmə mərhələsində əlavə 10 milyon dollar cəlb edib və ümumi dəyəri 300 milyon dollara çatıb.

    Poke-un ortaya çıxması agent əsaslı AI sistemlərinə marağın artdığı bir dövrə təsadüf edir. Bu sahədə daha mürəkkəb həllər, məsələn OpenClaw, artıq mövcuddur. Lakin bu cür sistemlər texniki bilik tələb etdiyi və təhlükəsizlik riskləri yaratdığı üçün geniş auditoriya üçün əlçatan deyil. Məhz bu problemi həll etmək istəyən Poke komandası AI agentləri hər kəs üçün “mesaj yazmaq qədər sadə” etməyi qarşısına məqsəd qoyub.