Alexa Plus-un veb versiyası istifadəyə verildi

    Technote.az “Engadget” platformasına istinadən bildirir ki, Amazon-un yenilənmiş süni intellekt əsaslı səs köməkçisi Alexa Plus üçün veb sayt artıq bəzi istifadəçilər üçün aktivdir. Alexa.com ünvanı fevral ayında Alexa Plus-un təqdimatı zamanı elan edilsə də, indiyə qədər yalnız məlumat səhifəsinə yönləndirirdi. Son günlər isə məhdud sayda istifadəçi bu ünvanda tam funksional Alexa Plus veb interfeysini görməyə başlayıb.

    Amazon hesabına daxil olduqdan sonra istifadəçi qısa quraşdırma mərhələsindən keçir və böyük ekranda “Hello, how can I help?” mesajı ilə qarşılanır. Veb interfeys Alexa Plus-un mobil tətbiqdəki çatbotuna bənzəyir, lakin klaviatura və geniş ekran sayəsində istifadəsi daha rahatdır. İstifadəçilər fayl yükləyə, planlama, öyrənmə, məzmun yaratma, alış-veriş və axtarış üçün hazır sorğulardan yararlana bilirlər. Sol paneldə əvvəlki çatlar (o cümlədən Echo cihazlarından olanlar), ağıllı ev idarəetməsi, təqvim, siyahılar, xatırlatmalar, tapşırıqlar və yüklənmiş fayllar bölməsi yer alır. Ağıllı ev cihazlarının veb üzərindən sürətli idarəsi xüsusilə diqqət çəkir.

    Yeni veb versiya Alexa Plus-un yalnız evdə deyil, gündəlik iş proseslərində də aktiv istifadə edilən universal AI köməkçiyə çevrilməsini hədəfləyir. Amazon bununla ChatGPT, Claude və Gemini kimi platformalarla birbaşa rəqabətə girir. Alexa.com hazırda məhdud Early Access mərhələsindədir. Xidmətdən istifadə üçün Amazon Prime üzvlüyü tələb olunur və gələcəkdə aylıq 19,99 dollar abunə modeli ilə də təqdim ediləcəyi bildirilib.