Alman “Foodforecast” AI startapı 8 milyon avro investisiya cəlb edib

    Technote.az “TNW” platformasına istinadən bildirir ki, Foodforecast ultra-təzə qida məhsullarında israfın azaldılması üçün 8 milyon avro həcmində Series A investisiya raundunu uğurla tamamlayıb. Almaniyanın Köln şəhərində yerləşən startap Avropa bazarında genişlənməyi hədəfləyir.

    İnvestisiya raunduna SHIFT Invest və European Circular Bioeconomy Fund birgə rəhbərlik edib. Mövcud investorlar Future Food Fund və Aeronaut Invest də raundda iştirak ediblər.

    2018-ci ildə təsis olunan və 2022-ci ildən kommersiya fəaliyyətinə başlayan şirkət çörək məhsulları, sendviçlər və “ready-to-eat” (hazır istehlak üçün) yeməklər kimi qısa saxlama müddətinə malik məhsullar üçün süni intellekt əsaslı proqnozlaşdırma alətləri hazırlayır. Bu kateqoriyaya aid məhsullar adətən bir neçə saat və ya bir gün ərzində satılıb istehlak olunur.

    Ənənəvi olaraq bu sahədə planlama prosesi manual şəkildə aparılırdı ki, bu da çox vaxt artıq istehsala, məhsul israfına və gəlir itkisinə səbəb olurdu. Foodforecast-un AI sistemi isə tələbi daha dəqiq proqnozlaşdıraraq mağazaların istehsal və sifariş proseslərinə inteqrasiya olunur və əvvəllər intuisiya ilə verilən qərarları avtomatlaşdırır.

    Şirkətin məlumatına görə, platformadan istifadə edən müştərilər qida israfını 30 faizə qədər azaldır, satışları isə təxminən 11 faiz artırır. Eyni zamanda, əvvəl manual şəkildə həyata keçirilən sifariş və istehsal tapşırıqlarının 90 faizdən çoxu avtomatlaşdırılır ki, bu da komandaların daha çox xidmət və əməliyyat keyfiyyətinə fokuslanmasına imkan yaradır.

    Hazırda Foodforecast-un həlləri Avropa üzrə minlərlə mağazada tətbiq olunur. İnvestorlar şirkətin fəaliyyətini süni intellektin həm iqtisadi, həm də ekoloji baxımdan ölçülə bilən təsir yaratmasının nümunəsi kimi qiymətləndirirlər.