Amazon Alexa+ ilə süni intellekt podkastları yaratmağa başladı

    Technote.az “Mashable” platformasına istinadən bildirir ki, Amazon süni intellekt əsaslı köməkçisi Alexa+ üçün yeni funksiyanı təqdim edib. “Alexa Podcasts” adlanan bu yenilik istifadəçilərə istənilən mövzuda süni intellekt tərəfindən yaradılmış podkast epizodları hazırlamağa imkan verir. İstifadəçi Alexa+ köməkçisindən xəbərlər, idman nəticələri, film rəyləri və ya maraqlandığı digər mövzular barədə podkast yaratmağı istəyə bilər.

    Şirkətin açıqlamasına görə, istifadəçilər podkastın uzunluğunu, üslubunu və hətta süni intellekt aparıcılarının xarakterini də seçə biləcəklər. “Brief”, “Sweet”, “Chill” və “Sassy” kimi fərqli üslublar təqdim olunur. Daha sonra Alexa iki süni intellekt aparıcının qarşılıqlı söhbəti formasında qısa podkast epizodu hazırlayaraq onu Echo cihazlarına və Alexa tətbiqinə göndərir. Amazon bildirir ki, sistemin məlumat bazası 200-dən çox media mənbəsinə əsaslanır. Bu siyahıya Associated Press, Reuters, The Washington Post, TIME, Forbes, Business Insider, Politico və USA Today kimi nüfuzlu media qurumları daxildir.

    Yeni funksiya texnologiya ictimaiyyətində birmənalı qarşılanmayıb. Tənqidçilər hesab edir ki, bu cür həllər insan aparıcılar, redaktorlar və prodüserlər tərəfindən hazırlanan podkastların yerini tutaraq internetdə “AI podslop” adlandırılan, yəni kütləvi və keyfiyyətsiz süni intellekt məzmunlarının artmasına səbəb ola bilər. Son araşdırmalara görə, son dövrlərdə yayımlanan podkastların təxminən 39 %-nin süni intellekt vasitəsilə yaradıldığı ehtimal edilir.

    Beləliklə, Amazon Alexa+ ilə podkast istehsalını daha əlçatan etməyə çalışsa da, bu addım eyni zamanda AI tərəfindən yaradılan məzmunların keyfiyyəti və gələcəyi ilə bağlı müzakirələri yenidən gündəmə gətirib.