Amazon Alexa-nı alış-veriş sisteminə inteqrasiya etdi

    Technote.az “The Verge” platformasına istinadən bildirir ki, Amazon özünün süni intellekt əsaslı köməkçisi olan Alexa-nı artıq birbaşa alış-veriş platformasına inteqrasiya edir. Şirkət “Alexa for Shopping” adlı yeni sistemi ilə istifadəçilərə sadəcə məhsul axtarmaq deyil, həm də daha ağıllı alış-veriş təcrübəsi təqdim etməyi hədəfləyir. Yeni funksiya ABŞ-də mərhələli şəkildə istifadəyə verilməyə başlayıb.

    “Alexa for Shopping” əslində şirkətin əvvəlki AI alış-veriş köməkçisi olan Rufus-u əvəz edir. Amazon bildirir ki, yeni sistem daha güclü, daha dərin inteqrasiya olunmuş və daha funksionaldır. Alexa artıq məhsulları müqayisə edə, qiymət endirimi üçün bildiriş qura, müəyyən şərtlərlə avtomatik sifariş verə və hətta digər saytlar üzərindən istifadəçi üçün alış-veriş edə bilir.

    Məsələn, istifadəçi “əgər bu günəş kremi 10 dollara düşərsə və son 2 ayda almamışamsa səbətə əlavə et” kimi əmrlər verə bilər. Alexa həmçinin məhsulun son 1 illik qiymət tarixçəsini analiz edir və uyğun endirimləri avtomatik izləyir. Amazon-un Alexa və Echo bölməsinin vitse-prezidenti Daniel Rausch bildirib ki, sistem artıq təkcə Amazon məlumat bazası ilə işləməyəcək. Alexa internetdəki digər mənbələrdən də məlumat toplayaraq istifadəçiyə daha fərdiləşdirilmiş cavablar təqdim edəcək.