Amazon Alexa-nı süni intellekt agentinə çevirir

    Amazon səsli köməkçisi Alexa üçün "Moonraker" kod adlı yeni layihə üzərində işləyir. Layihənin məqsədi Alexa-nı sadəcə suallara cavab verən köməkçidən çıxarıb, istifadəçinin tapşırıqlarını müstəqil şəkildə yerinə yetirən süni intellekt agentinə çevirməkdir. Business Insider-ın daxili şirkət sənədlərinə istinadən yaydığı məlumata görə, Moonraker Alexa+ platformasının ən bahalı layihələrindən biri hesab olunur. Sənədlərdə qeyd edilir ki, təkcə 2026-cı ildə layihənin işləməsi üçün tələb olunan qrafik prosessorlara (GPU) 100 milyon dollardan çox vəsait xərclənə bilər. Hazırda Alexa+ artıq Uber vasitəsilə taksi sifariş etmək və Ticketmaster üzərindən bilet almaq kimi funksiyaları dəstəkləyir. Moonraker isə bu imkanları daha da genişləndirəcək. Məsələn, istifadəçi "Mənə taksi çağır və dostuma gecikəcəyimi mesajla bildir" dedikdə, Alexa hər iki əməliyyatı ardıcıl şəkildə özü yerinə yetirəcək.

    Bu yanaşma OpenAI, Google və Anthropic kimi şirkətlərin inkişaf etdirdiyi agent tipli süni intellekt sistemlərinə bənzəyir. Məqsəd istifadəçinin bir əmrlə bir neçə işi avtomatik icra edə bilməsidir. Lakin bu imkanların böyük hesablama gücü tələb etməsi Amazon üçün ciddi maliyyə yükü yaradır. Daxili sənədlərdə Moonraker-in Alexa+ layihəsinin ən yüksək əməliyyat xərclərinə malik hissəsi olduğu vurğulanır. Hətta layihənin gecikdirilməsi və ya miqyasının kiçildilməsi variantları da müzakirə edilib. Məlumata görə, Amazon Moonraker üçün yüzlərlə NVIDIA qrafik prosessorundan istifadə etməyi planlaşdırır. Sınaqlar zamanı isə Anthropic şirkətinin Sonnet modeli mürəkkəb məntiqi tapşırıqlar və vizual cavabların emalı üçün istifadə olunub.

    Alexa+ platformasının inkişafı da problemsiz keçməyib. Xidmət bir neçə dəfə gecikdirilib, beta istifadəçiləri isə yanlış cavablar və gözlənilməz davranışlarla qarşılaşıblar. Hətta istifadəçilərdən biri Alexa-nın akvarium filtrini söndürdüyünü və nəticədə balıqlarının tələf olduğunu bildirib. Buna baxmayaraq, Amazon layihəni inkişaf etdirməyə davam edir. Şirkətin baş direktoru Andy Jassy son səhmdar məktubunda bildirib ki, istifadəçilər əvvəlki dövrlə müqayisədə Alexa+ ilə iki dəfə daha çox ünsiyyət qurur və platforma üzərindən sifarişlərin sayı üç dəfə artıb.