Amazon Alexa Plus üçün AI yeniləməsini təqdim etdi

    Amazon süni intellekt əsaslı Alexa Plus səsli köməkçisi üçün yeniləmə istifadəyə verib. Hazırda önizləmə mərhələsində olan yeniləmə sayəsində Alexa Plus daha çox ağıllı ev cihazı ilə işləyə və istifadəçilərin mürəkkəb səslə verdiyi əmrləri avtomatik şəkildə yerinə yetirə biləcək.

    Yenilik çərçivəsində Alexa Plus artıq Bosch, Delta, Ecovacs, iRobot, Yale Home, Whirlpool, Tapo, Eufy və digər istehsalçıların cihazları ilə inteqrasiya olunur. Ən vacib yenilik isə köməkçinin istifadəçinin dediyini analiz edərək uyğun cihazı və funksiyanı özü seçməsidir. Amazon bildirir ki, bu imkanlar şirkətin hazırladığı yeni AI Developer Toolkit vasitəsilə mümkün olub. Yeni platforma istehsalçılara əvvəllər dəstəklənməyən funksiyaları da Alexa Plus-a inteqrasiya etməyə imkan verir.

    Şirkət eyni zamanda açıq mənbəli Model Context Protocol (MCP) standartını da dəstəkləməyə başlayıb. Bu standart süni intellekt modellərinin müxtəlif xidmət və sistemlərlə daha rahat əlaqə qurmasına imkan verir. Bunun sayəsində ilin sonuna qədər Canva, Headspace, Priceline, Lyft, Cengage, Virgin Atlantic və digər şirkətlər də Alexa Plus üçün inteqrasiyalar təqdim edəcək.