Amazon Web Services səhiyyə üçün yeni AI agent platformasını təqdim etdi

     Technote.az “TechCrunch” platformasına istinadən bildirir ki, Amazon Web Services (AWS) səhiyyə təşkilatlarının gündəlik inzibati işlərini avtomatlaşdırmaq üçün yeni süni intellekt platforması olan Amazon Connect Health xidmətini təqdim edib.

     Şirkətin açıqlamasına görə, AI agentləri ilə işləyən bu platforma həkim və klinikalar üçün təkrar olunan inzibati prosesləri sadələşdirməyi hədəfləyir. Sistem xüsusilə qəbul vaxtlarının planlaşdırılması, tibbi sənədləşmə, pasiyentlərin identifikasiyası və digər administrativ işlərin avtomatik idarə olunmasına kömək edir.

     Platforma səhiyyə məlumatlarının təhlükəsizliyini tənzimləyən Health Insurance Portability and Accountability Act (HIPAA) standartlarına uyğundur və mövcud elektron tibbi qeydiyyat (EHR) sistemləri ilə inteqrasiya olunur. AWS bildirir ki, xidmət artıq EHR proqram təminatı istehsalçıları, məlumat inteqratorları və pasiyent xidmətləri şirkətləri ilə əməkdaşlıq edir.

     Yeni platforma AWS-in səhiyyə sektorunda ilk təşəbbüsü deyil. Şirkət daha əvvəl 2018-ci ildə tibbi məlumatların analizinə yönəlmiş Amazon Comprehend Medical, 2021-ci ildə sağlamlıq məlumatlarını təşkil edən Amazon HealthLake, 2022-ci ildə isə bioinformatika iş axınları üçün HealthOmics xidmətlərini təqdim etmişdi.

      Bununla belə, Amazon Connect Health AWS-in ilk dəfə olaraq AI agentlərini tənzimləmə tələblərinə uyğun platformada səhiyyə sektoruna təqdim etdiyi əsas məhsul hesab olunur. Sistem klinik proqram təminatı ilə birlikdə işləyərək tibbi tarixçələrin yoxlanması, tibbi kodlaşdırma və kliniki sənədləşmə kimi prosesləri avtomatlaşdırır.

      Hazırda platformada pasiyent identifikasiyası və avtomatik sənədləşmə funksiyaları mövcuddur. Qəbul vaxtlarının planlaşdırılması və pasiyent məlumat analitikası isə test mərhələsindədir. Tibbi kodlaşdırma kimi əlavə funksiyaların yaxın zamanda təqdim ediləcəyi gözlənilir.

      Xidmətin qiyməti aylıq istifadəçi başına 99 dollar təşkil edir və bu paket ayda 600 pasiyent görüşünə qədər istifadəni əhatə edir. AWS-in məlumatına görə, əksər ailə həkimləri ay ərzində orta hesabla 300 pasiyent qəbul edir.