AMD 32 768 Zen 6 nüvəli Helion server rəfini təqdim etdi

    “AMD” məlumat mərkəzləri və tapşırıqları müstəqil yerinə yetirən süni intellekt agentləri üçün “Helion” adlı 21 düymlük standart server rəfi hazırlayıb. Yalnız prosessorlardan qurulan versiya 32 768 “Zen 6” nüvəsi ilə işləyə bilir. Bunun üçün hər biri 256 nüvəli 128 “EPYC Venice 9996” prosessoru işlədilir. “Helion” 2027-ci ilin ilk yarısında çıxacaq.

    Layihə “Open Compute Project” təşkilatının ORv4 standartına əsaslanır. Rəf adi İT rəflərindən bir qədər enli və hündürdür, daxilində 44 “OpenU” modulu var. Sistemi həm hava ilə, həm də mayeni birbaşa çiplərə çatdırmaqla soyutmaq olur. “Helion” məlumat mərkəzlərində fərqli avadanlıqların birgə işləməsi üçün hazırlanmış DC-MHS standartına da uyğundur.

    “Helion” ötən il göstərilən “Helios” rəfini əvəz etməyəcək, onu tamamlayacaq. “Helios” süni intellekt modellərinin öyrədilməsi və sorğuların emalı üçündür. Yeni layihədə əsas işi prosessorlar görür. Məsələn, sistem proqram təminatının hazırlanması kimi tapşırıqları yerinə yetirə, ağır süni intellekt hesablamalarını ayrıca serverə göndərə bilər. Ümumi sistemdə hər istifadəçiyə ayrıca hesablama sahəsi ayrılan AI agentləri də bu quruluşdan yararlana bilər.

    Layihənin hibrid versiyası da var. Bu variantda 16 “MI350P” qrafik prosessoru və 102 Tbps sürətli şəbəkə işləyir, amma əsas prosessorların sayı azalır. “AMD” onu məlumatların idarəsini, şəbəkəni və süni intellekt işlərini eyni rəfdə birləşdirmək istəyən şirkətlər üçün hazırlayıb. Beləliklə, müəssisələr ayrıca sistemlər əvəzinə vahid avadanlıq işlədə biləcəklər.

    “AMD” hazır server rəflərini özü satmayacaq. Şirkət nümunə layihəni OCP çərçivəsində paylaşacaq, istehsal və satışı avadanlıq tərəfdaşları görəcək. İlk nümayiş zamanı tərəfdaşların adları açıqlanmayıb. Adların şirkət rəhbəri Lisa Su-nun çıxışında elan ediləcəyi deyilib. Yeni rəfin bazara çıxışı bu ilin sonlarında geniş yayılması gözlənilən “Zen 6” server platformasından sonraya planlaşdırılıb.