Animaj Disney-lə hazırladığı ilk Ozzy Fox animasiya serialını təqdim etdi

    “Animaj” “Disney”lə birgə hazırladığı ilk layihəni - “Ozzy Fox” animasiya serialını göstərib. Məktəbəqədər uşaqlar üçün hazırlanan serial iyulda “YouTube” və “Disney Junior”da yayımlanmağa başlayıb. Tezliklə onu “Disney Plus”da da izləmək olar. Parlaq rənglər, mahnılar və tülkü ailəsinin hekayəsi üzərində qurulan serial insanlar tərəfindən çəkilib və canlandırılıb. Süni intellektdən yalnız hazırlıq prosesini sürətləndirən köməkçi alət kimi yararlanılıb.

    Studiyanın yeni “FlipMove” sistemi son bir neçə ildə hazırlanan süni intellekt modellərini animatorlar üçün vahid alətdə birləşdirir. “Animaj” tapşırıqları müxtəlif proqram köməkçiləri arasında bölən iş prosesi də qurub. Köməkçilərdən biri rejissorun qeydlərini oxuyur, digəri həmin səhnəyə uyğun modeli seçir. Sistem serialın üslubu, personajları və süjeti barədə qapalı məlumat bazası ilə işləyir.

    Animator əvvəlcə personajın əsas duruşlarını çəkir. Süni intellekt bu şəkillər arasındakı hərəkətləri tamamlayır, animator da nəticəni yoxlayıb düzəliş edir. “FlipMove” nümayişində əl ilə çəkilmiş eskiz qısa vaxtda 3D animasiyaya çevrilib. Daha sonra “Ozzy Fox” serialındakı ev və personajlar səhnəyə əlavə olunub. Şirkətin məlumatına görə, animatorlar hər kadr üzərində tam nəzarəti saxlayırlar.

    “Animaj” rejissorun ilkin süjet qeydlərindən hazır versiyaya qədər olan vaxtı azaltmaq istəyir. Şirkətin fikrincə, yaradıcı heyət eyni müddətdə 2 dəfə çox düzəliş edə bilər və bununla yekun işin keyfiyyəti arta bilər. “Disney Innovation” yazıçı və animatorların işlərini itirmədiyini, sadəcə məzmunun daha sürətli hazırlandığını açıqlayıb. Qapalı süni intellekt modellərinin verdiyi nəticələr də hər serialın öz görünüşünə uyğunlaşdırılır.

    “Animaj” süni intellektlə bağlı manifest də yayımlayıb. Studiyaya görə, əsas problem texnologiyanın özü deyil, sadə əmrlərlə kütləvi şəkildə hazırlanan keyfiyyətsiz “AI slop” məzmunudur. “Ozzy Fox” iyulda natamam fonlara, həmçinin obyektlərin üzərində hərf və rəqəmlərin olmamasına görə belə məzmun kimi tənqid edilmişdi. Studiya serialı insanların yaratdığını, süni intellektin tamamladığı detalları da əməkdaşların yoxladığını vurğulayır. Şirkət qənaət olunan vaxtın yenidən yaradıcı işə ayrılmasını istəyir.