Anthropic 7 milyard dollara MatX-i almaq planından imtina edib

    Anthropic şirkətinin çip istehsalçısı MatX-i təxminən 7 milyard dollara satın almağı planlaşdırdığı, lakin sonradan bu fikirdən daşındığı bildirilir. Reuters-in məsələyə yaxın mənbələrə istinadən yaydığı məlumata görə, tərəflər arasında satınalma ilə bağlı danışıqlar kifayət qədər irəliləmişdi. Lakin sonradan Anthropic MatX-i tamamilə almaq əvəzinə şirkətlə əməkdaşlıq imkanlarını müzakirə etməyə başlayıb. Anthropic-in satınalma planından niyə imtina etdiyi hələlik məlum deyil. Şirkət Reuters-in sorğusuna şərh verməkdən imtina edib, MatX isə sorğuya cavab verməyib. Hazırda tərəflər arasında əməkdaşlıq müqaviləsinin imzalandığına dair də rəsmi məlumat yoxdur.

    2023-cü ildə yaradılan MatX xüsusi olaraq böyük dil modellərinin (LLM) öyrədilməsi üçün nəzərdə tutulan prosessorlar hazırlayır. Şirkətin təsisçiləri Reiner Pope və Mike Gunter daha əvvəl Google-un süni intellekt üçün hazırladığı TPU çiplərinin proqram və aparat təminatı üzərində çalışıblar. MatX bu ilin fevralında keçirilən Series B investisiya raundunda 500 milyon dollar cəlb edib. Şirkət hazırda təxminən 4 milyard dollar qiymətləndirmə ilə yeni investisiya cəlb etməyə çalışır. Bu baxımdan Anthropic-in müzakirə etdiyi 7 milyard dollarlıq satınalma qiyməti MatX-in hazırkı qiymətləndirməsindən təxminən 75 % yüksək olub.

    MatX-in əsas məqsədi Nvidia-nın universal qrafik prosessorlarına alternativ olaraq konkret süni intellekt tapşırıqları üçün optimallaşdırılmış çiplər hazırlamaqdır. Şirkət hazırladığı prosessorların kütləvi tədarükünə 2027-ci ildən başlamağı planlaşdırır. Anthropic də son dövrdə Nvidia-dan asılılığını azaltmaq və öz çip infrastrukturu üzərində daha çox nəzarət əldə etmək istiqamətində addımlar atır. Şirkət artıq daxili çip komandası formalaşdırır və öz prosessorunun istehsalı üçün Samsung ilə də danışıqlar aparır.

    Buna görə MatX-in satın alınması Anthropic-ə hazır təcrübəyə malik mühəndis komandası və çip texnologiyası qazandıra bilərdi. Lakin şirkətin MatX ilə tərəfdaşlıq modelini seçməsi eyni texnologiyadan şirkəti tamamilə satın almadan istifadə etməsinə imkan verə bilər.