Anthropic-in dəyəri 900 milyard dolları keçə bilər

    Technote.az “TechCrunch” platformasına istinadən bildirir ki, süni intellekt sahəsində fəaliyyət göstərən Anthropic yeni və çox böyük investisiya turuna hazırlaşır. Məlumatlı mənbələrin bildirdiyinə görə, şirkət investorları son qərarlarını vermək üçün cəmi 48 saatlıq müddətlə tələsdirir və bu raundun yaxın iki həftə ərzində tamamlanması gözlənilir.

    Gözlənilən investisiya məbləği təxminən 50 milyard dollar səviyyəsindədir. Daha diqqətçəkən məqam isə şirkətin hədəflədiyi qiymətləndirmədir. Mənbələrə görə, Anthropic bu raundda təxminən 900 milyard dollar dəyərində qiymətləndirilə bilər. Hətta investor marağının çox yüksək olması səbəbindən yekun qiymətləndirmənin bu rəqəmi də keçə biləcəyi istisna edilmir.

    Bu göstərici reallaşarsa, Anthropic yalnız öz əvvəlki nəticələrini deyil, həm də əsas rəqibi olan OpenAI-ı geridə qoyacaq. Belə ki, OpenAI bu ilin əvvəlində 122 milyard dollarlıq investisiya raundunu 852 milyard dollar qiymətləndirmə ilə tamamlamışdı. Şirkətin maliyyə göstəriciləri də diqqət çəkir. Anthropic rəsmi olaraq illik gəlir tempinin 30 milyard dolları keçdiyini açıqlasa da, mənbələr real rəqəmin artıq 40 milyard dollara yaxın olduğunu bildirir. Bu isə süni intellekt bazarında artan tələbin şirkətin sürətli böyüməsinə ciddi təsir etdiyini göstərir.