Anthropic öz AI çiplərini hazırlamağı planlaşdırır

    Technote.az “TNW” platformasına istinadən bildirir ki, süni intellekt sahəsində fəaliyyət göstərən Anthropic şirkəti öz AI çiplərini hazırlamaq imkanlarını araşdırır. Məlumata görə, layihə hələ ilkin mərhələdədir və şirkət konkret çip dizaynı üzərində qərar verməyib. Həmçinin bu istiqamətdə ayrıca mühəndis komandası da formalaşdırılmayıb. Bu səbəbdən Anthropic-in gələcəkdə çipləri özü istehsal edib-etməyəcəyi hələ qeyri-müəyyəndir. Şirkət alternativ olaraq üçüncü tərəf istehsalçılardan çip almağa davam edə bilər.

    Bu addımın arxasında isə sürətlə artan hesablama ehtiyacı dayanır. Anthropic bu həftə açıqlayıb ki, onun illik gəlir tempi artıq 30 milyard dolları keçib. Bu isə 2025-ci ilin sonundakı təxminən 9 milyard dollarlıq göstərici ilə müqayisədə ciddi artım deməkdir. Hazırda şirkət öz Claude süni intellekt modelini müxtəlif çiplər üzərində işlədərək optimallaşdırır. Bunlara Google və Broadcom tərəfindən hazırlanan TPU-lar, eləcə də Amazon və Nvidia həlləri daxildir.

    Bununla yanaşı, Anthropic yaxın günlərdə Google və Broadcom ilə uzunmüddətli müqavilə imzalayıb. Müqaviləyə əsasən, şirkət 2027-ci ildən etibarən təxminən 3.5 giqavat həcmində TPU hesablama gücünə çıxış əldə edəcək. Bu, 2026-cı ilin əvvəlində istifadə olunan təxminən 1 giqavat güclə müqayisədə 3 dəfə çoxdur. Qeyd edək ki, xüsusi AI çipinin hazırlanması təxminən 500 milyon dollara başa gələ bilər. Bu isə hələ mənfəət əldə etməyən bir şirkət üçün böyük rəqəm olsa da, Anthropic-in sürətli gəlir artımı fonunda bu investisiya daha real görünür.