Anthropic şirkəti Claude Opus 4 və Sonnet 4 süni zəka modellərini təqdim edib

     Anthropic iki yeni süni zəka modelinin - Claude Opus 4 və Claude Sonnet 4-ü təqdim edib. Bu modellər mürəkkəb tapşırıqları yerinə yetirmək, proqramlaşdırma və internet axtarışı üçün nəzərdə tutulub. Şirkətin sözlərinə görə, Opus 4 flaqman modeli seriyada ən güclü modeldir və avtonom rejimdə 7 saata qədər işləyə bilir. Opus 4 və Sonnet 4 əvvəlki modellərlə müqayisədə tapşırıqları yerinə yetirərkən “boşluqlardan” və sadələşdirilmiş yollardan istifadə etməyə 65% daha az meyillidirlər. Bundan əlavə, bu modellər uzunmüddətli tapşırıqlar üzərində işləyərkən, xüsusilə istifadəçinin lokal fayllarına çıxış olduqda, vacib məlumatları daha yaxşı yadda saxlayır. Tərtibatçılar həmçinin bildirirlər ki, Opus 4 bir sıra göstəricilər üzrə rəqiblərini geridə qoyub.

     Məsələn, daxili testlər göstərib ki, bu model proqramlaşdırma və veb axtarış kimi alətlərin istifadəsi ilə bağlı tapşırıqlarda Google Gemini 2.5 Pro, OpenAI o3 reasoning və GPT-4.1-dən daha yüksək nəticə göstərib. Ümumi tapşırıqlara yönəldilmiş Sonnet 4 versiyası, əvvəlki Sonnet 3.7 modelinin yerini alıb. Şirkətin vurğuladığına görə, yeni model daha dəqiq cavablar, inkişaf etdirilmiş məntiqi düşünmə bacarıqları və kod yazma qabiliyyəti ilə seçilir. Yeni funksiyalar arasında thinking summaries (düşüncə xülasələri) qeyd olunur. Bu funksiya süni zəkanın düşüncə prosesini sadə və anlaşılan şəkildə qısa şəkildə əks etdirməyə imkan verir. Eyni zamanda, extended thinking (genişləndirilmiş düşüncə) funksiyasının beta versiyası istifadəyə verilib. Bu funksiya modellərin məntiqi analiz rejimi ilə alətlərin istifadəsi rejimi arasında keçid etməsinə şərait yaradır ki, bu da cavabların dəqiqliyini artırır.

     Həm Claude Opus 4, həm də Claude Sonnet 4 modelləri artıq Anthropic-in API-si, Amazon Bedrock platforması və Google Cloud-un Vertex AI xidməti vasitəsilə əlçatandır. Hər iki versiya Claude-un ödənişli abunə paketlərinə daxildir, lakin Sonnet 4 həmçinin pulsuz istifadə üçün də mövcuddur. Lakin extended thinking də daxil olmaqla bəzi əlavə funksiyalar yalnız ödənişli abunəçilər üçün əlçatandır. Bundan əlavə, əvvəllər məhdud test rejimində təqdim olunan və tərtibatçılar üçün nəzərdə tutulmuş Claude Code adlı süni zəka agenti əsaslı əmrli interfeys artıq ictimai istifadəyə açılıb. Fevral ayında ilkin buraxılışdan sonra bu alət artıq bütün istifadəçilər üçün əlçatandır. Anthropic eyni zamanda modellərini daha tez-tez yeniləməyi planlaşdırdığını da elan edib. Bu addım OpenAI, Google və Meta kimi rəqiblərin inkişaf tempi ilə ayaqlaşmaq məqsədi daşıyır.