Apple AI çipləri üçün yeni şirkətlər almağa hazırlaşır

    Apple süni intellekt sahəsində infrastrukturunu gücləndirmək məqsədilə server çipləri hazırlayan şirkətlərin satın alınmasını nəzərdən keçirir. Məlumata görə, şirkət bu istiqamətdə yarımkeçirici istehsalçıları və investisiya bankları ilə ilkin danışıqlar aparır. Bildirilir ki, hazırda Apple-ın AI serverlərində istifadə etdiyi M2 Ultra çipləri yüksək hesablama tələb edən tapşırıqlar üçün kifayət qədər performans göstərmir. Bu səbəbdən Siri-nin süni intellekt funksiyalarının əsas hissəsi hələ də Google Cloud üzərində çalışan NVIDIA qrafik prosessorları vasitəsilə emal olunur. Apple öz serverlərindən istifadə etməyə çalışsa da, mövcud infrastrukturun bunun üçün yetərli olmadığı qeyd edilir.

    Məlumata əsasən, Apple yaxın vaxtlarda AI serverlərini M5 Ultra çipləri ilə yeniləməyi planlaşdırır. Daha güclü server prosessoru kimi nəzərdə tutulan M7 Ultra əsaslı həllin isə 2029-cu ildən tez hazır olmayacağı bildirilir. Bundan əlavə, şirkətin "Baltra" kod adlı yeni nəsil server çipini bu il təqdim etməsi planlaşdırılsa da, layihənin gecikdiyi deyilir. Apple bu yaxınlarda ABŞ-də istehsal olunan çiplərin tədarükü üçün Broadcom ilə 30 milyard dollarlıq müqavilə də imzalayıb. Bununla belə, şirkətin server çipləri sahəsində təcrübəsinin məhdud olması səbəbindən bu istiqamətdə fəaliyyət göstərən şirkətləri satın alması ehtimalı artır.