Apple CEO-su Tim Cook: "DeepSeek innovativlik sərgiləyib"

     Apple şirkətinin CEO-su Tim Cook, DeepSeek süni zəka modelini “səmərəliliyi artıran innovasiya” kimi qiymətləndirib. Bu barədə o, analitiklərlə keçirdiyi konfrans zamanı DeepSeek-in Apple biznesinə təsiri ilə bağlı suala cavab verərkən bildirib. Tim Cook vurğulayıb ki, Apple süni zəka üçün hibrid yanaşma tətbiq edir. Bəzi tapşırıqlar lokalda (cihazın özündə) icra olunur, bəzi tapşırıqlar isə OpenAI və digər tərəfdaşlarla birlikdə bulud üzərindən yerinə yetirilir.

     Şirkətin süni zəkaya investisiya yatırmaqda ehtiyatlı olduğunu bildirən Cook, şirkətin xərc siyasətində ölçülü yanaşma tətbiq etdiyini qeyd edib. Qeyd etmək lazımdır ki, OpenAI, DeepSeek-i öz süni zəka modellərindən istifadəyə dair qaydaları pozmaqda ittiham edib. OpenAI iddia edir ki, DeepSeek dərin öyrənmə prosesi zamanı onların məlumatlarından  icazəsiz istifadə edib. Bu isə Çin şirkətinin əldə etdiyi uğurları sual altına qoya bilər. Tim Cook bildirib ki, Apple gələcəkdə öz ekosisteminə digər şirkətlərin süni zəka modellərini inteqrasiya edə bilər. Potensial namizədlər arasında Google şirkətinin Gemini modeli və Anthropic şirkətinin Claude modeli yer alır.

     Lakin o, DeepSeek-in Apple sistemlərinə inteqrasiya ediləcəyinə dair heç bir ehtimal irəli sürməyib. Analitiklər Apple Intelligence funksiyalarının satışlara təsirini soruşublar. Cook qeyd edib ki, bu funksiyalar iPhone satışlarında dərhal nəzərə çarpacaq artıma səbəb olmasa da, bu texnologiyaların tətbiq edildiyi regionlarda satış göstəriciləri daha güclü olub.

     O əlavə edib ki, Apple həmişə uzunmüddətli innovasiyalara investisiya edir və nəticələrin dərhal görünməməsi şirkətin strategiyasını dəyişdirmir. Apple, süni zəka ilə yaradılan xəbər xülasəsi funksiyasını dayandırıb. Buna səbəb bu funksiyanın bəzi hallarda faktları təhrif edən yanlış başlıqlar formalaşdırması olub. Şirkət bildirib ki, gələcəkdə bu problemi aradan qaldırmaq üçün sistemi daha diqqətlə yoxlayacaq və funksiyanı təkmilləşdirəcək.