Apple görmə məhdudiyyətli insanlara süni zəka vasitəsilə yardıma gəlib

     SceneScout - Apple və Kolumbiya Universitetinin birgə tədqiqat layihəsidir. Layihənin məqsədi görmə qabiliyyəti zəif və tamamilə görmə imkanından məhrum olmuş insanlara ətraf məkanda istiqamətlənməkdə kömək etməkdir. Bu məqsədlə Apple Maps və GPT-4o texnologiyalarının imkanları birləşdirilib. İstifadəçilər yalnız marşrut üzrə addım-addım təlimat və istiqamətlər əldə etməklə kifayətlənmir, həm də marşrutu məhəllə-məhəllə araşdıra bilirlər. Sistem iki rejim təklif edir. Route Preview rejimi istifadəçinin yolda nələrə rast gələcəyini əvvəlcədən təsvir edir: səkidəki maneələr, yolayrıcılar və vizual istinad nöqtələri haqqında məlumat verir.

     Virtual Exploration rejimində isə istifadəçi nə axtardığını bildirir (məsələn, “parkları olan sakit yaşayış məhəlləsi”) və süni zəka bu sorğu əsasında istifadəçini mərhələli şəkildə lazım olan yerə istiqamətləndirir. SceneScout Apple Maps xəritələrinə əsaslanır və piyadanın görmə bucağını təqlid edir. Sistem gördüklərini şərh edir və onları qısa, orta və ya uzun təsvirlərə bölünmüş strukturlaşdırılmış mətn şəklində təqdim edir. Məsələn, sistem belə məlumat verə bilər: “Binanın qarşısında avtomobillər park edilib. Küçə nişanları buranın Figueroa küçəsi olduğunu göstərir. Sağ tərəfdə Bank of America yerləşir”. Və ya: “Burada ağaclarla əhatələnmiş geniş səkilər və bir neçə mağaza var.

     Həmçinin, küçənin üstündən keçən piyada körpüləri görünür, hansı ki binaları birləşdirir”. Görmə məhdudiyyətli 10 nəfərin iştirak etdiyi ilkin sınaqlar ümidverici nəticələr göstərib. İştirakçılar xidmətin faydalılığını yüksək qiymətləndiriblər və xüsusilə Virtual Exploration rejimini vurğulayıblar. Lakin müəyyən çatışmazlıqlar da müşahidə olunub. Bəzi təlimatlar qeyri-dəqiq olub. Məsələn, yol nişanlarının səhv göstərilməsi və ya tikinti işləri və park edilmiş nəqliyyatla bağlı köhnəlmiş məlumatlar. SceneScout-un geniş tətbiqindən danışmaq hələ tezdir. Layihənin əsas məqsədi Apple Maps API-si ilə çoxmodallı böyük dil modeli arasında qarşılıqlı əlaqəni araşdırmaqdır.