Apple ilə OpenAI arasındakı hüquqi mübahisə dərinləşir

    Apple ilə OpenAI arasında şirkət sirlərinin mənimsənilməsi iddiaları ilə bağlı hüquqi qarşıdurma daha da genişlənib. Financial Times-ın məlumatına görə, Apple hazırda OpenAI-da çalışan təxminən 40 keçmiş əməkdaşına hüquqi bildiriş göndərərək işlə bağlı bütün sənəd və məlumatların saxlanılmasını tələb edib. Şirkət bu addımı gələcək məhkəmə prosesində sübut kimi istifadə oluna biləcək məlumatların silinməsinin qarşısını almaq məqsədilə atıb. Apple iyulun əvvəlində OpenAI-a qarşı məhkəmə iddiası qaldıraraq şirkətin keçmiş Apple əməkdaşları vasitəsilə məxfi texnologiyalar və kommersiya sirlərindən faydalandığını iddia etmişdi. İddiada OpenAI-ın aparat bölməsinin rəhbəri Tang Tan və şirkətin aparat komandasında çalışan Chang Liu da cavabdeh şəxslər arasında göstərilir.

    Apple hesab edir ki, məsələ yalnız bu iki şəxslə məhdudlaşmır. Şirkətin məhkəməyə təqdim etdiyi sənədlərdə Tang Tanın Apple əməkdaşlarını iş müsahibələrinə şirkətə məxsus hissələr və materiallarla gəlməyə təşviq etdiyi iddia olunur. Bundan əlavə, Tanın Apple-dan ayrıldıqdan sonra qaytarmadığı cihaz vasitəsilə şirkətin daxili sistemlərinə çıxış imkanını müzakirə etdiyi də qeyd edilir. Məhkəmə sənədlərində Apple artıq bəzi məlumatların silinmiş ola biləcəyindən narahat olduğunu bildirir. Şirkətin məlumatına görə, hazırda 400-dən çox keçmiş Apple əməkdaşı OpenAI-da çalışır. OpenAI isə irəli sürülən ittihamları qəbul etmir. Buna baxmayaraq, Apple göndərdiyi yeni hüquqi bildirişlərlə daha geniş miqyasda sübut toplamağa çalışdığını göstərir.