Apple Intelligence funksiyaları ödənişli ola bilər

    Apple-ın bəzi Apple Intelligence funksiyalarını gələcəkdə ödənişli təqdim edə biləcəyinə dair yeni ipucları ortaya çıxıb. iOS 27-nin beşinci developer beta versiyasında iCloud+ və HomeKit Secure Video ilə bağlı görünən yeni limitlər şirkətin abunə modelində dəyişiklik edə biləcəyini düşündürür. Apple hazırda iCloud+ abunəçilərinə yaddaş həcmi ilə yanaşı HomeKit Secure Video imkanları da təqdim edir. Mövcud sistemdə 50 GB-lıq paket bir, 200 GB-lıq paket isə beş təhlükəsizlik kamerasını dəstəkləyir. 2 TB-dan 12 TB-a qədər olan daha yüksək paketlərdə isə dəstəklənən kameraların sayı limitsizdir. Lakin avqustun 10-da yayımlanan iOS 27 Beta 5-də vəziyyət fərqli görünür. Beta versiyada HomeKit Secure Video parametrlərinə baxan bəzi istifadəçilər iCloud+ paketlərinin artıq konkret kamera limitləri göstərdiyini aşkar ediblər.

    Məsələn, 2 TB-lıq iCloud+ paketindən istifadə edən bir şəxsin hesabında cəmi 5 kameranın dəstəkləndiyi göstərilib. Halbuki hazırkı qaydalara əsasən, bu paket limitsiz sayda HomeKit Secure Video kamerasını dəstəkləməlidir. Daha maraqlı detal isə Apple Intelligence ilə əlaqəlidir. Digər istifadəçinin ekranında “iCloud+ paketiniz 15 kamera üçün video xülasələrini əhatə edir” ifadəsi görünüb. Sözügedən istifadəçi aylıq 59,99 dollara başa gələn 12 TB-lıq ən yüksək iCloud+ paketindən istifadə etdiyini bildirib. Bu, Apple-ın təhlükəsizlik kameralarından çəkilən görüntüləri Apple Intelligence vasitəsilə analiz və xülasə edən yeni funksiyalar üçün paketdən asılı limitlər tətbiq edə biləcəyinə işarə edir.