Apple Photos tətbiqinə yeni AI alətləri gətirir

     Technote.az “Apple Insider” platformasına istinadən bildirir ki, Apple şirkəti növbəti böyük əməliyyat sistemi yeniləməsi ilə Photos tətbiqinə bir sıra yeni süni intellekt funksiyaları əlavə etməyə hazırlaşır. Bloomberg-in məlumatına görə, bu yeniliklər iOS 27, iPadOS 27 və macOS 27 ilə birlikdə payızda təqdim oluna bilər.

    Hazırda Photos tətbiqində yalnız “Clean Up” adlı bir AI funksiyası mövcuddur. Bu funksiya istifadəçilərdən qarışıq rəylər alıb. Bəzi hallarda şəkillərdə qeyri-dəqiq detallar və vizual qüsurlar yaradır.

    Yeni paket isə daha geniş imkanlar təqdim edəcək:

* Enhance : Şəkillərin rəngini, işıqlandırmasını və ümumi keyfiyyətini avtomatik optimallaşdıracaq.
* Extend : İstifadəçilərə şəkilin kənarlarını genişləndirərək kadra əlavə kontent yaratmağa imkan verəcək.
* Reframe : Xüsusilə məkan (spatial) fotolar üçün nəzərdə tutulub və çəkilişdən sonra perspektivi dəyişməyə imkan verəcək.
* Contextual editing : Şəkil daxilində ağıllı dəyişikliklər etməyə şərait yaradacaq.

    Bu funksiyaların əsas üstünlüklərindən biri isə bütün proseslərin cihaz daxilində (on-device) həyata keçirilməsidir. Bu yanaşma Apple-ın istifadəçi məlumatlarının məxfiliyinə verdiyi önəmi bir daha göstərir.

    Qeyd edək ki, bu tip AI redaktə alətləri artıq bazarda yeni deyil. Məsələn, Adobe Photoshop uzun müddətdir oxşar imkanlar təqdim edir. Buna görə də Apple-ın bu addımı daha çox rəqabətdə geri qalmamaq məqsədi daşıyır.

     Bununla belə, şirkətin son dövrlərdə bəzi “Apple Intelligence” funksiyalarını gecikdirməsi nəzərə alınarsa, bu yeniliklərin elan olunan vaxtda təqdim olunub-olunmayacağı hələ də sual altındadır.