Apple qiymətləri qaldıra bilər

    Süni intellekt texnologiyalarına artan tələbat qlobal yaddaş (DRAM) və saxlama (NAND) çipləri bazarında ciddi çatışmazlıq yaradıb. Bu vəziyyət isə Apple-ın gələcək məhsullarının qiymətlərinə təsir göstərə bilər. Apple-ın baş direktoru vəzifəsindən ayrılmağa hazırlaşan Tim Cook bildirib ki, yaddaş çiplərinin qiyməti son bir ildə təxminən dörd dəfə artıb və şirkətin bu xərcləri uzun müddət öz üzərinə götürməsi mümkün deyil. Onun sözlərinə görə, qiymət artımları artıq qaçılmaz görünür.

    Cook hansı məhsulların bahalaşacağını və bunun nə vaxt baş verəcəyini açıqlamasa da, ekspertlər ən böyük təsirin yeni iPhone modellərində hiss olunacağını düşünürlər. Apple-ın sentyabr ayında təqdim etməsi gözlənilən növbəti iPhone seriyası qiymət artımının elan olunacağı əsas namizədlərdən biri hesab edilir. Məlumata görə, şirkətin mənfəət marjasını qoruması üçün yeni iPhone Pro modelinin qiymətinə təxminən 270 dollar əlavə olunması lazım gələ bilər. Hazırda iPhone 17 Pro modeli 1099 dollardan başlayır.

    Qiymət artımı yalnız iPhone-larla məhdudlaşmaya da bilər. Apple Watch, iPad, Mac və Vision Pro kimi cihazlar da yaddaş və saxlama çiplərindən istifadə etdiyi üçün eyni risklə üz-üzədir.