Apple Siri-ni xəbərləri izləməkdə daha bacarıqlı etmək istəyir

    Apple süni intellektlə işləyən Siri-nin aktual xəbərlər və real vaxtda dəyişən məlumatlarla bağlı suallara daha yaxşı cavab verməsi üçün xəbər nəşriyyatları ilə razılaşmalar əldə etməyə çalışır.

    “The Wall Street Journal”ın avqustun 12-də yayımladığı xəbərə görə, Apple son aylarda bir neçə xəbər nəşriyyatı ilə əlaqə saxlayaraq onların məzmununa gələcək Siri AI köməkçisinin çıxış əldə etməsini müzakirə edib. Çoxillik olması nəzərdə tutulan bu razılaşmalar Siri-yə günün aktual hadisələri və daim yenilənən digər məlumatlar barədə sualları cavablandırmağa kömək edə bilər.

    Məlumata görə, Apple bu əməkdaşlıqlar üçün yüz milyonlarla dollarlıq büdcə ayırmağı nəzərdən keçirir. Şirkətin təklif etdiyi modelə əsasən, nəşriyyatlara onların hazırladığı materiallardan istifadə edildikcə ödəniş ediləcək. Bu yanaşma bir çox mövcud süni intellekt lisenziyalaşdırma müqavilələrindən fərqlənir. Belə müqavilələrdə nəşriyyatlara adətən məzmunlarına daha geniş çıxış qarşılığında əvvəlcədən müəyyən edilmiş məbləğ ödənilir.

     Apple-ın hansı nəşriyyatlarla danışıqlar apardığı və hər hansı razılaşmanın artıq imzalanıb-imzalanmadığı isə məlum deyil. Şirkət “The Wall Street Journal”ın suallarını cavablandırmaqdan imtina edib.