Apple Mesajlar tətbiqinə ilk rəsmi süni intellekt agentini əlavə etdi

    Apple-ın Mesajlar tətbiqi ilk dəfə üçüncü tərəf süni intellekt agentinə rəsmi şəkildə qapılarını açıb. ABŞ-nin Kaliforniya ştatında fəaliyyət göstərən The Interaction Company tərəfindən hazırlanmış Poke adlı süni intellekt köməkçisi Apple tərəfindən təsdiqlənərək iMessage üzərindən istifadəyə verilib. Poke Apple-ın əvvəlcə şirkətlərin müştərilərlə ünsiyyəti üçün yaratdığı Messages for Business platforması vasitəsilə fəaliyyət göstərir. Bununla da o, iMessage daxilində işləyən ilk rəsmi üçüncü tərəf süni intellekt agenti statusunu qazanıb.

    Yeni xidmət istifadəçilərə gündəlik işlərin avtomatlaşdırılmasında kömək edir. Məsələn, Poke elektron məktublara cavab hazırlaya, görüş və ya şam yeməyi planlaşdırılarkən tarix, vaxt və məkan seçimi ilə bağlı təkliflər verə, xatırlatmalar yarada bilir. Bununla yanaşı, süni intellekt agenti internetdə axtarış aparmaq, şəkillər yaratmaq və redaktə etmək, müxtəlif avtomatlaşdırmalar qurmaq, daxili aviareyslər üçün qeydiyyatdan keçmək, sərfəli aviabiletləri izləmək kimi imkanlar təqdim edir. Xidmət həmçinin QR kodlar yarada, YouTube videolarının mətn xülasələrini hazırlaya və Philips Hue işıqlandırma sistemləri ilə Sonos ağıllı səs avadanlıqlarını idarə edə bilir.

    Poke bir sıra məşhur xidmətlərlə də inteqrasiya olunub. Bunlara Oura Ring, Microsoft Outlook, Gmail, GitHub, Strava və Navan kimi platformalar daxildir. Şirkətin həmtəsisçisi Marvin von Hagen bildirib ki, Apple bu platformada fəaliyyət göstərən süni intellekt xidmətlərindən istifadəçi əsaslı ödəniş alır. Onun sözlərinə görə, bu model gələcəkdə Apple üçün yeni gəlir mənbəyinə çevrilə bilər.