Avropa Birliyi X platformasına qarşı ikinci araşdırmaya başladı

    Technote.az “Engadget” platformasına istinadən bildirir ki, Avropa İttifaqı X platformasına qarşı Grok süni intellekt alətinin qeyri-konsensual intim görüntülər yaratması ilə bağlı ikinci böyük araşdırmaya başlayıb. İrlandiyanın Məlumatların Qorunması Komissiyası (DPC) bildirib ki, istintaq X-in Avropa İttifaqı və Avropa İqtisadi Zonasında yaşayan şəxslərin, o cümlədən uşaqların şəxsi məlumatlarını necə emal etdiyini araşdıracaq.

    Məsələ xüsusilə ciddi xarakter daşıyır. Böyük Britaniyada fəaliyyət göstərən Center for Countering Digital Hate (CCDH) təşkilatının 29 dekabr – 9 yanvar tarixlərini əhatə edən araşdırmasına əsasən, 11 gün ərzində X platformasında təxminən 3 milyon seksual xarakterli süni görüntü yaradılıb. Onların təxminən 23 mini uşaqlara aid olub.

    DPC-nin müavini Qraham Doyl bildirib ki, qurum artıq bir neçə həftədir məsələ ilə bağlı X Internet Unlimited Company (XIUC) ilə əlaqə saxlayır. İrlandiya DPC-si XIUC üçün Aİ/EEA üzrə aparıcı nəzarət orqanıdır və istintaq çərçivəsində şirkətin GDPR üzrə fundamental öhdəliklərə əməl edib-etmədiyi yoxlanılacaq. Əgər pozuntu təsdiqlənərsə, bu, X üçün Aİ miqyasında ciddi maliyyə və hüquqi nəticələrə səbəb ola bilər.

    Bu araşdırma artıq Avropa Komissiyasının yanvar ayında başlatdığı ayrıca istintaqın fonunda aparılır. Komissiya X platformasının Rəqəmsal Xidmətlər Aktı (DSA) çərçivəsində Grok-un yaratdığı riskləri düzgün qiymətləndirib-qiymətləndirmədiyini araşdırır. Söhbət xüsusilə qeyri-qanuni məzmunun, o cümlədən süni yaradılmış qeyri-konsensual cinsi görüntülərin yayılmasından gedir.