Böyük Britaniya Grok-un deepfake-lərinə reaksiya verdi

     Technote.az “The Verge” platformasına istinadən bildirir ki, Böyük Britaniyanın baş naziri Keir Starmer “X” platformasında Grok vasitəsilə böyüklərin və azyaşlıların deepfake görüntülərinin yaradılması ilə bağlı sərt açıqlama verib. Starmer bu məzmunları “iyrənc” adlandıraraq, “X”in məsuliyyət daşıdığını və hökumətin bu məsələyə qarşı tədbir görəcəyini bildirib.

      Greatest Hits Radio-ya müsahibəsində danışan Starmer, “Bu, qəbuledilməzdir. X öz işini qaydaya salmalı və bu materialları dərhal platformadan silməlidir. Biz buna dözməyəcəyik və tədbir görəcəyik,” deyə vurğulayıb. Onun sözlərinə görə, hökumətə bütün mümkün variantların nəzərdən keçirilməsi tapşırılıb.

      Bu fonda Böyük Britaniyanın kommunikasiya tənzimləyicisi Ofcom “X”in ölkənin Online Safety Act (Onlayn Təhlükəsizlik Qanunu) çərçivəsində öhdəliklərini pozub-pozmadığını araşdırmağa başlayıb. Qanun platformaları zərərli və qeyri-qanuni məzmunun yayılmasına görə məsuliyyət daşımağa məcbur edir. Ofcom nümayəndəsi bildirib ki, “X”in cavabından sonra uyğunluq problemlərinin olub-olmadığı ilə bağlı sürətli qiymətləndirmə aparılacaq.