Braziliya süni zəkanın inkişafına 4.2 milyard dollar xərcləyəcək

     Braziliya hökuməti Petropolis şəhərində yerləşən Milli Elmi Hesablama Laboratoriyasında (LNCC) quraşdırılmış Santos Dumont (SDumont) superkompüterinin təkmilləşdirilməsini planlaşdırır. Bu addım Brazilian Artificial Intelligence Plan (BPIA - Braziliya Süni Zəkanın İnkişaf Planı) proqramı çərçivəsində atılır. Ölkə məqsəd qoyub ki, dünyadakı ən güclü 5 superkompüterdən biri olacaq səviyyədə süni zəka superkompüteri əldə etsin. Bu superkompüter vasitəsilə yerli süni zəka modellərinin öyrədilməsi planlaşdırılır. The Dannemann Siemsen Institute (IDS) resursunun məlumatına görə, “Hamının xeyri üçün süni zəka” adlanan BPIA layihəsi Braziliyanı süni zəka texnologiyaları sahəsində dünya liderləri sırasına çıxarmağı hədəfləyir.

     Layihə özəl sektor və digər qurumlarla əməkdaşlıq çərçivəsində hazırlanıb və süni zəkanın səhiyyə, təhsil, ictimai təhlükəsizlik və enerji sahələri daxil olmaqla müxtəlif sahələrdə inkişafı və tətbiqi üçün məqsəd və istiqamətləri müəyyənləşdirir. BPIA proqramı öz investisiyalarını özəl sektordan, Elmi-Texnoloji İnkişaf üzrə Milli Fond (FNDCT), Elm, Texnologiya və İnnovasiyalar Nazirliyinə (MCTI) bağlı olan Finep (Tədqiqat və Layihələrin Maliyyələşdirilməsi Fondu) təşkilatından və Milli İqtisadi və Sosial İnkişaf Bankından (BNDES) alacaq. Ümumilikdə, BPIA-nın 2025-2028-ci illər üzrə həyata keçirilməsi üçün 23 milyard real (təxminən 4.2 milyard dollar) ayrılacaq. BPIA proqramı süni zəkanın köməyi ilə əhaliyə göstərilən dövlət xidmətlərinin təkmilləşdirilməsinə yönəlib. Plan iki əsas mərhələni əhatə edir: “Təcili təsir tədbirləri” və “Strukturlaşdırma tədbirləri”.

     İnvestisiyaların əsas hissəsi “Təcili təsir tədbirləri”nin icrasına yönəldiləcək. Bu mərhələyə artıq həyata keçirilən və ya yaxın zamanda başlayacaq 31 təşəbbüs daxildir. Onlar səhiyyə, kənd təsərrüfatı, ətraf mühit, sənaye, ticarət və xidmət sahələri, təhsil, sosial inkişaf və dövlət xidmətlərinin idarə olunması kimi prioritet sahələrdə konkret problemlərin həllinə yönəlib. Santos Dumont superkompüterinin təkmilləşdirilməsi üçün Braziliya təxminən 1.8 milyard real (322 milyon dollar) ayıracaq. Bu, hesablama gücünü 4 dəfə artırmağa imkan verəcək. Əsas təchizatçı əvvəlki kimi Eviden şirkəti olacaq - məhz bu şirkət 2015-ci ildə Santos Dumont superkompüterini quraşdırmışdı. O zaman sistemin məhsuldarlığı 1.1 petaflops təşkil edirdi. 2019-cu ildə aparılmış təkmilləşdirmə nəticəsində onun məhsuldarlığı 1.5 petaflops-a qədər artırılmışdı. Sonuncu yenilənmə bu ilin iyul ayında tamamlanıb və nəticədə superkompüterin məhsuldarlığı 18.85 petaflops-a çatıb.