Çağrı mərkəzi operatoru hindistanlı işçilərin aksentini yumşaltmaq üçün süni zəkadan istifadə edir

     Dünyanın ən böyük çağrı mərkəzi operatoru olan Teleperformance şirkəti süni zəkadan istifadə edərək ingilis dilli hindistanlı işçilərin aksentini yumşaldır. Şirkət nümayəndələrinin sözlərinə görə, bu texnologiya onların danışığını ana dili ingilis olan insanlar üçün daha anlaşılan edir. Aksent yumşaltma texnologiyası Fransanın Sanas şirkəti tərəfindən təmin edilir. Teleperformance bu şirkətə 2024-cü ilin fevral ayında 13 milyon dollar investisiya yatırıb.

     Bu texnologiyanı hansı müştərilərin istifadə etdiyi dəqiq açıqlanmasa da, Teleperformance-in Hindistan çağrı mərkəzlərindən faydalanan şirkətlər arasında Apple, TikTok və Samsung da var. Teleperformance-in baş direktor müavini Thomas Mackenbrock bildirib: "Xəttin digər tərəfində hindistanlı bir operator olduqda, bəzən onu anlamaq çətin olur. Texnologiya hind aksentini sıfır gecikmə ilə neytrallaşdırır. Bu, müştəri məmnuniyyətini artırır və sorğuların emal müddətini azaldır, beləliklə, hər iki tərəf üçün faydalıdır".

     Teleperformance-in məlumatına görə, bu texnologiya çağrı mərkəzi işçilərinin məhsuldarlığını artırır. Bundan əlavə, operatorlar daha az aqressiya və təhqirlə qarşılaşır, həmçinin müştərilər daha az hallarda zənglərinin rəhbərliyə yönləndirilməsini tələb edir. Sanas bildirib ki, bu proqram təminatı "aksentə görə diskriminasiyanı azaltmaq" məqsədilə hazırlanıb. Texnologiya hazırda hindistan və filippin aksentləri üçün əlçatandır. Bundan əlavə, proqram təminatı fon səslərini – məsələn, təcili yardım siqnalını və ya ofis səs-küyünü də aradan qaldırır.

Mənbə: Bloomberg