Canva ilk süni intellekt şəkil modeli Canva Craft-ı təqdim etdi

    “Canva” süni intellektlə şəkil yaradan ilk modeli “Canva Craft”ı çıxarıb. Alətlə sosial media və marketinq materialları, məhsul fotoları, rəqəmsal sənət əsərləri, personajlar və təbiət təsvirləri hazırlamaq olur. Model birbaşa dizayn xidmətində işlədiyi üçün yaradılan şəkilləri layihələrə əlavə etmək daha rahatdır. “Canva” öz “Canva Research” laboratoriyasını dünyanın 2-ci ən qabaqcıl şəkil yaratma mərkəzi sayır.

    “Canva Craft” və “ChatGPT”nin pulsuz versiyaları 5 fərqli tapşırıqla sınaqdan keçirilib. Onlardan məhsul reklamı, masa görünüşü, həyat tərzi fotosu, sərgi posteri və yuxunu xatırladan bloq təsviri hazırlamaq istənilib. “Canva Craft” hər sorğuya 5 variant göstərib, “ChatGPT” isə adətən 1 şəkil yaradıb. Nəticələr şəkillərin nə qədər real görünməsinə, verilən tapşırığa uyğunluğuna və dizayn layihəsində yararlı olub-olmamasına görə qiymətləndirilib.

    Məhsul reklamı sınağında hər iki model eyni nəticəni göstərib. Masa görünüşü, insan fotosu və sərgi posteri tapşırıqlarında “ChatGPT” daha uğurlu olub. Xüsusilə insan təsvirində dəri və üz ifadəsi daha təbii görünüb. “Canva Craft”ın yaratdığı şəkildə ağız və dəri ilə bağlı qüsurlar diqqət çəkib. Son tapşırıqda isə daha aydın və sorğuya uyğun səhnə yaratdığı üçün “Canva Craft” üstün sayılıb.

    “Canva”nın pulsuz planında süni intellekt limiti təxminən 5 sorğudan sonra bitir. Hər sorğuda 4 nəticə limitə daxil olduğuna görə pulsuz istifadəçi ayda təxminən 20 şəkil yarada bilər. Aylıq qiyməti 18 dollar (təxminən 31 manat) olan “Canva Pro” ilə ayda təxminən 200 şəkil yaratmaq mümkündür. Qiyməti 25 dollar (təxminən 43 manat) olan “Business” planında bu rəqəm təxminən 400 şəkildir.

    “ChatGPT”nin pulsuz versiyasında gündə təxminən 5 şəkil yaratmaq olur, amma bu say istifadəçiyə görə dəyişə bilər. Aylıq 20 dollarlıq (təxminən 34 manat) “ChatGPT Plus” üçün rəsmi limit açıqlanmayıb. Buna baxmayaraq, bir neçə saat ərzində yüzlərlə şəkil hazırlamaq olur. Sınaqda “ChatGPT” ümumilikdə daha yaxşı təsvirlər yaradıb. “Canva Craft”ın əsas fərqi şəkil yaratmağı və sonrakı dizayn işlərini eyni xidmətdə birləşdirməsidir.