Carbon Robotics yeni süni intellekt modelini təqdim etdi

    Technote.az "TechCrunch” platformasına istinadən bildirir ki, fermerlərin tarlada hansı bitkinin alaq otu olduğunu və hansının qorunmalı olduğunu müəyyən etməsi illərdir əsasən təcrübəyə və gözlə müşahidəyə əsaslanırdı. İndi isə bu qərarı süni intellekt də verə bilir.

    ABŞ-nin Sietl şəhərində yerləşən Carbon Robotics kənd təsərrüfatı üçün hazırladığı yeni süni intellekt modeli Large Plant Model (LPM)-i təqdim edib. Bu model bitkiləri real vaxtda tanıyır və fermerlərə yeni yaranan alaq otlarını robotu yenidən öyrətmədən məhv etməyə imkan verir. Şirkət tərəfindən istehsal olunan LaserWeeder adlı robotlar lazer texnologiyası ilə alaq otlarını məhv edir. Yeni LPM modeli bu robotların “beyni” rolunu oynayan Carbon AI sisteminə inteqrasiya olunub. Model 15 ölkədə, 100-dən çox təsərrüfatda çalışan robotlardan toplanmış 150 milyondan çox foto və məlumat nöqtəsi əsasında öyrədilib.

    Carbon Robotics-in qurucusu və baş icraçı direktoru Paul Mikesell bildirib ki, əvvəl yeni bir alaq növü ortaya çıxanda, hətta eyni bitki fərqli torpaqda bir az fərqli görünsə belə sistemi yenidən etiketləmək və öyrətmək lazım olurdu. Bu proses isə təxminən 24 saat çəkirdi. Yeni LPM modeli isə əvvəllər heç görmədiyi bitkini belə dərhal tanıya bilir. Fermer real vaxtda sistemə “bu alaqdır, bunu məhv et” deyə bilir və bunun üçün əlavə etiketləmə və ya təlimə ehtiyac qalmır.

    Şirkət 2018-ci ildə təsis olunub və indiyə qədər Nvidia NVentures, Bond və Anthos Capital daxil olmaqla investorlarından 185 milyon dollardan çox vençur sərmayəsi cəlb edib. Yeni model mövcud robotlara proqram təminatı yeniləməsi ilə ötürüləcək və sistem işlədikcə daha da təkmilləşdiriləcək.