ChatGPT artıq Spotify, Uber və DoorDash ilə birbaşa işləyir

    Technote.az “TechCrunch” platformasına istinadən bildirir ki, OpenAI, ChatGPT tətbiqinə yeni tətbiq inteqrasiyaları əlavə edib. Bu yenilik sayəsində istifadəçilər Spotify, Uber, DoorDash və digər xidmətlərdəki hesablarını birbaşa ChatGPT-yə bağlayaraq gündəlik tapşırıqları süni intellekt vasitəsilə yerinə yetirə bilirlər.

    İnteqrasiyadan istifadə etmək üçün əvvəlcə ChatGPT hesabına daxil olmaq lazımdır. Daha sonra istənilən tətbiqin adını sorğunun əvvəlində yazmaq kifayətdir. ChatGPT avtomatik olaraq istifadəçini giriş və hesab bağlama mərhələlərinə yönləndirir. Məsələn, Spotify inteqrasiyası vasitəsilə fərdi musiqi zövqünə uyğun pleylistlər yaradılır və bu siyahılar birbaşa Spotify tətbiqində görünür. Bütün tətbiqləri eyni anda qoşmaq istəyənlər üçün daha rahat yol da mövcuddur. Bunun üçün Settings (Ayarlar) bölməsinə daxil olub Apps and Connectors menyusuna keçmək lazımdır. Buradan mövcud inteqrasiyalara baxmaq, istənilən tətbiqi seçmək və rəsmi giriş səhifəsi vasitəsilə hesabı bağlamaq mümkündür.

    Bununla yanaşı, məxfilik məsələsi xüsusi diqqət tələb edir. Hər hansı bir tətbiqi ChatGPT-yə bağladıqda, həmin xidmətə aid müəyyən məlumatlar süni intellektlə paylaşılır. Məsələn, Spotify hesabı qoşulduqda pleylistlər, dinləmə tarixçəsi və digər şəxsi məlumatlar əlçatan ola bilər. Bu məlumatlar istifadə təcrübəsini fərdiləşdirmək üçün istifadə olunsa da, istifadəçilərə icazələri diqqətlə yoxlamaq tövsiyə edilir.