ChatGPT-də yeniyetmələr üçün daha sərt rejim istifadəyə verilir

    OpenAI yeniyetmələrin ChatGPT-dən daha təhlükəsiz istifadəsini təmin etmək üçün hazırladığı ChatGPT for Teens rejimini qlobal miqyasda istifadəyə verməyə başlayıb. Yeni sistem yaşı 18-dən aşağı olduğu müəyyən edilən istifadəçiləri avtomatik olaraq daha sərt təhlükəsizlik qaydalarının tətbiq edildiyi rejimə keçirəcək. Şirkətin bildirdiyinə görə, yeniyetmələrin bunun üçün ayrıca hesab yaratmasına və ya hansısa funksiyanı aktivləşdirməsinə ehtiyac olmayacaq. İstifadəçi hesabında yaşının 18-dən aşağı olduğunu göstəribsə və ya OpenAI-ın sistemi onun yeniyetmə olduğunu müəyyən edibsə, ChatGPT for Teens avtomatik olaraq standart təcrübəyə çevriləcək.

    Yeni rejim əsasən iki istiqamət üzərində qurulub: təhsil və təhlükəsizlik. ChatGPT for Teens-də OpenAI-ın daha əvvəl təqdim etdiyi Study Mode mühüm rol oynayacaq. Bu rejim istifadəçiyə sualın cavabını birbaşa təqdim etmək əvəzinə, istiqamətləndirici suallar və izahlarla onun cavabı özü tapmasına kömək edir. Study Mode yeniyetmələr üçün daim aktiv olmayacaq. Bunun əvəzinə Study Hours adlı yeni funksiya təqdim edilir. Yeniyetmələr və ya valideynləri günün müəyyən saatlarını dərs vaxtı kimi təyin edə biləcəklər və həmin müddətdə Study Mode avtomatik aktivləşəcək.