ChatGPT oyun yazıçısının yerini aldı?

    Saber Interactive ötən ay təqdim edilən Rideshare “Stimulator” oyununda yazıçıların süni intellektlə əvəz edilməsi ilə bağlı iddiaları təkzib edib. Şirkətin baş direktoru Matthew Karch bildirib ki, nə Saber, nə də oyunun tərtibatçısı Unigine hər hansı yazıçını süni intellektlə əvəz edib. Mübahisə oyunun keçmiş aparıcı yazıçısı Stella Sacco-nun açıqlamasından sonra başlayıb. Sacco Bluesky-da bildirib ki, layihənin aparıcı yazıçısı olub, lakin oyun hələ hazırlanarkən Saber onu ChatGPT ilə əvəz edib. Onun sözlərinə görə, oyundakı sərnişinlərin səsləndirilməsində də süni intellektdən istifadə olunub.

    Rideshare “Stimulator” oyunçunu taksi xidmətinə bənzər sərnişindaşıma biznesinin sahibi roluna qoyan sürücülük simulyatorudur. Təqdimat videosundakı bəzi sərnişin dialoqları və səslər də generativ süni intellektdən istifadə edildiyi barədə şübhələr yaradıb. Buna baxmayaraq, hazırda oyunun Steam səhifəsində generativ AI istifadəsi ilə bağlı hər hansı qeyd yoxdur.

    Saber rəhbəri Matthew Karch isə oyunun əsas hekayəsinin tamamilə real insanlar tərəfindən yazıldığını deyir. Bununla yanaşı, o təsdiqləyib ki, oyunun eksperimental free-ride rejimində süni intellektdən istifadə ediləcək. Şirkətin izahına görə, bu rejimdə sərnişinlərin sayı faktiki olaraq sonsuz olduğundan onların dialoq və davranışlarının yaradılmasında AI texnologiyalarına ehtiyac var.