Süni intellektin səhiyyə sahəsindəki performansını müşahidə etmək üçün qısa müddət əvvəl bir tədqiqat aparılıb. Ortaya çıxan nəticələr isə olduqca təəccüblü olub. Təcrübə nəticəsində, ChatGPT-dən istifadə edən həkimlərin, istifadə etməyən həkimlərə nisbətən bir qədər daha yaxşı nəticə göstərdiyi müşahidə edilib. Lakin burada əsas məqam odur ki, süni intellekt vasitəsi təkbaşına xəstəlik diaqnozunda bütün həkimlərdən daha yüksək bal toplayıb.

     Boston şəhərindəki Beth Israel Deaconess Tibb Mərkəzində daxili xəstəliklər üzrə mütəxəssis Dr. Adam Rodman nəticələr qarşısında təəccübünü gizlədə bilməyib və açıqlamasında “şoka düşdüm” ifadəsini işlədib. Məsələni bir qədər də aydınlaşdırsaq, ChatGPT müəyyən meyarlar çərçivəsində təkbaşına xəstəlik diaqnozu qoymaqda 90 bal toplamağı bacarıb. Bununla yanaşı, süni intellekt vasitəsindən istifadə edən həkimlər 76 bal, heç bir vasitə istifadə etməyənlər isə orta hesabla 74 bal toplayıblar.

     Yuxarıda da qeyd olunduğu kimi, nəticələrə heyrətlənən Dr. Adam Rodman məlumatları daha dərindən təhlil etmək üçün süni intellektdən istifadə edən həkimlərin ChatGPT ilə apardıqları dialoqları nəzərdən keçirib. Bu zaman isə müşahidə olunub ki, süni intellekt diaqnoz üçün konkret detallar təqdim etsə də, həkimlər bu detallara inanmayıblar və nəticədə öz fikirlərinə sadiq qalaraq rəy bildiriblər. Dr. Adam Rodman mövzu ilə bağlı fikirlərini belə ifadə edib: “Süni intellekt onların razılaşmadığı bir şeyi söyləyəndə, təəssüf ki, həkimlər onu dinləmədilər”.