Çində süni zəka kardioloqu təqdim edilib

     Şanxayda Çinin ilk dəfə ürək-damar xəstəliklərinin diaqnostikası üçün nəzərdə tutulmuş süni zəka modeli - CardioMind təqdim edilib. Bu sistem tibbi kartları, müayinə nəticələrini və beynəlxalq tədqiqatları analiz edərək həkimlərə dəqiq diaqnoz təyin etməkdə kömək edir. Yüz minlərlə klinik hal üzərində öyrədilmiş CardioMind EKQ və ultrasəs müayinələri də daxil olmaqla kompleks tibbi məlumatları qiymətləndirir. Bu texnologiyanın əsas məqsədi həkimlərin iş yükünü azaltmaqdır. CardioMind, Fudan Universitetinin Çjunşan xəstəxanası və Şanxay Süni Zəka Akademiyası tərəfindən birgə hazırlanıb. Sistem xəstələrin xəstəlik tarixçəsini və test nəticələrini beynəlxalq tədqiqatlarla müqayisə edərək diaqnostik tövsiyələr təqdim edir.

     CardioMind ümumi kardiologiya bilik bazası ilə yanaşı, həm də xəstəxananın kardiologiya şöbəsindəki yüz minlərlə elektron tibbi kart üzərində təlimatlandırılıb. Bu yanaşma sistemin həkimlərin diaqnostika və müalicə metodlarını dərk etməsinə və mürəkkəb klinik halları analiz etməsinə imkan yaradıb. Süni zəka modeli elektrokardioqramma (EKQ), ultrasəs görüntüləri və laborator analizlər də daxil olmaqla müxtəlif tədqiqat məlumatlarını kompleks şəkildə təhlil edə bilir. Tərtibatçıların sözlərinə görə, CardioMind həkimləri əvəz etmək üçün deyil, onları dəstəkləmək üçün yaradılıb. O, "ikinci pilot" rolunu oynayaraq, yüklənmiş kardioloqlara daha sürətli və dəqiq işləməyə kömək edir.

     Layihənin rəhbəri, Çin Elmlər Akademiyasının akademiki və aparıcı kardioloq Ge Junbo sistemin məqsədini belə izah edib: "Biz sistemi ürək-damar xəstəlikləri ilə bağlı məlumatlarla təmin edir və onu aparıcı kardioloq-ekspert kimi düşünməyə öyrədirik". Belə alətlərin tətbiqi xüsusilə Çin üçün böyük əhəmiyyət kəsb edir. Əmək resurslarının azalması və əhalinin yaşlanması fonunda ölkənin səhiyyə sistemi ciddi yüklənmə ilə üzləşir. Bu vəziyyət Çjunşan xəstəxanasının statistikası ilə də təsdiqlənir. Ötən il cəmi 136 kardioloq 820 000 ambulator qəbul həyata keçirib. Süni zəkanın tətbiqi sayəsində həkimlər daha çox xəstəyə xidmət göstərə biləcək, ümumi iş yükü azalacaq və diaqnostika ilə müalicənin keyfiyyəti yüksələcək.

Mənbə: South China Morning Post