DeepSeek ilin sonuna kimi süni intellekt agenti funksiyalarına sahib yeni modelini təqdim etməlidir

     Bloomberg-in məlumatlı mənbələrə istinadən verdiyi xəbərə görə, DeepSeek startapı daha təkmil süni intellekt agenti funksiyalarına malik yeni model hazırlayır. Bu model insanın minimal iştirakı ilə çoxmərhələli əməliyyatları yerinə yetirməyə qadir olacaq. Sistem həmçinin öz əvvəlki fəaliyyətlərinə əsaslanaraq öyrənə və təkmilləşə biləcək. Süni intellekt agentləri süni intellektin növbəti inkişaf mərhələsi hesab olunur. Mənbələrin bildirdiklərinə görə, DeepSeek-in təsisçisi Liang Wehfeng komandasının bu ilin dördüncü rübündə yeni modeli təqdim etməsinə ümid edir. R1 modelinin təqdimatından sonra Çin startapı yalnız kiçik yeniləmələr buraxmışdı, halbuki ABŞ və Çindəki rəqibləri həmin müddətdə bir sıra yeni modellər hazırlayıblar.

     Yerli KİV-lər R2 modelinin buraxılışındakı gecikməni Liang-ın hər şeyi yüksək səviyyədə etmək istəyi ilə əlaqələndirirlər, baxmayaraq ki, təlim və ya inkişaf prosesində mümkün nasazlıqlarla bağlı da ehtimallar irəli sürülür. Bloomberg-in qeyd etdiyi kimi, DeepSeek-in əvvəllər açıqlanmayan yeni agent yönümlü model üzərində işi texnologiya sənayesində daha geniş dəyişiklikləri əks etdirir. Son bir neçə ay ərzində OpenAI, Anthropic və Microsoft şəxsi və peşəkar tapşırıqların optimallaşdırılması üçün agent proqram təminatının öz versiyalarını təqdim ediblər. Çin startapı Butterfly Effect də diqqət mərkəzinə düşüb, çünki o, insanın birbaşa rəhbərliyi olmadan mürəkkəb tapşırıqları yerinə yetirməyə qadir olan Manus AI adlı universal süni intellekt agentini təqdim edib.

     Süni intellekt xidmətlərinin yeni nəsli istirahət variantlarının axtarışından tutmuş kompüter kodunun yazılması və sazlanmasına qədər daha mürəkkəb tapşırıqları yerinə yetirmək üçün nəzərdə tutulub. Goldman Sachs tərəfindən dərc edilmiş tədqiqat hesabatına görə, generativ süni intellektin inkişafında növbəti mühüm addım süni intellekt agentləri vasitəsilə biznesin məhsuldarlığının artırılması olacaq. DeepSeek-in, eləcə də süni intellekt sənayesinin ən yaxın məqsədi getdikcə daha avtonom süni intellekt sistemlərinin yaradılmasıdır ki, onlar insanın demək olar ki, heç bir müdaxiləsi olmadan real dünyada mürəkkəb fəaliyyətləri başlada və həyata keçirə bilsinlər. Hazırda isə süni intellekt agentləri hələ də insanların nəzarətinə ehtiyac duyurlar.